इम्बोस्ड नम्बर जडान गर्ने कम्पनीको म्यादथप गर्ने तयारी : भीम रावल भन्छन्- जनतामाथि घात हुनेछ

काठमाडौं । सवारी साधनहरुमा इम्बोस्ड नम्बर राख्ने अमेरिका र बंगलादेशको संयुक्त लगानीको कम्पनी डेकाटोरसँग भएको बिगतको सम्झौता सकिएपछि वर्तमान सुशीला कार्की नेतृत्वको सरकारले म्यादथप गर्न लागेकोमा नेपाली कम्युनिष्ट पार्टीका नेता भीमबहादुर रावलले यस्तो निर्णय गरेमा त्यो नेपालको राष्ट्रियता र नेपाली जनतामाथिको घात गरेको ठहरिने बताएका छन् ।

नेपालीका ब्यक्तिगत विवरण बिदेशीको हातमा पुर्याउने, देवनागरी लिपिमा नेपाली भाषा सरकारी कामकाजको भाषा हुनेछ भन्ने संवैधानिक ब्यवस्थालाई उल्लंघन गर्ने र अत्यन्तै महंगो किसिमले नेपालमा लुट मच्चाउनेगरी भएको सम्झौताको बिरोध हुँदैआएको स्मरण गराउँदै पुनः म्याद थप्नु नहुने उनको भनाइ छ ।

रावलले बिहीबार बिहान सामाजिक संजालमा लेखेका छन्–‘सुशीला कार्की नेतृत्वको अन्तरिम सरकारले अमेरिका र बंगलादेशको संयुक्त कम्पनी डेकाटोरसँग विगतमा सवारी साधनहरूमा इम्बोड्स नम्बर राख्ने सम्बन्धमा भएको सम्झौतालाई म्याद सकिसकेपछि पुनः म्याद थप्ने समाचार सुनियो।

नेपालीका व्यक्तिगत विवरण विदेशीको हातमा पुर्‍याउने, देवनागरी लिपिमा नेपाली भाषा सरकारी कामकाजको भाषा हुनेछ भन्ने संवैधानिक व्यवस्थालाई उल्लंघन गर्ने र अत्यन्तै महँगो किसिमले नेपाली हरूमाथि लुट मचाउने गरी भएको सम्झौताको संसद र सडकमा चौतर्फी विरोध हुँदै आएको हो ।

यस्तो सम्झौताको म्याद सकिँदा फेरि म्याद थप्ने वर्तमान अन्तरिम सरकारले निर्णय गरेमा त्यो नेपालको राष्ट्रियता र नेपाली जनता माथिको घात ठहरिनेछ ।’