एमालेले पोखरामा कार्यक्रम बिथोल्न खोज्यो: सुदन गुरुङ

काठमाडौं । हामी नेपाली अभियानका संयोजक सुदन गुरुङले आफ्नो पोखरा भ्रमणलाई लिएर नेकपा एमाले र केही समूहले अवरोध गर्न खोजेको आरोप लगाएका छन् । उनले सामाजिक सञ्जालमार्फत आफूहरू पोखरा निस्किएको खबर पाएपछि कार्यक्रम बिथोल्ने प्रयास भइरहेको दाबी गरेका हुन् ।

उनले पोखरामा जनेजीको संगठन विस्तार र आम नागरिकसँग भेटघाटका लागि आफूहरू निस्किएको थाहा पाएपछि केही समूह र एमालेले कार्यक्रम बिथोल्न अथक प्रयास गरिरहेको दाबी गरेका हुन् ।

उनले भनेका छन्, ‘पोखरामा जेन–जी भाइबहिनीहरूको संगठन बलियो बनाउन र देशप्रेमी पोख्रेली आमा–बुबा, दाजुभाइ तथा दिदीबहिनीहरू भेट्न हामी पोखरा निस्कियौँ। तर, हामी आउने खबर पाएदेखि केही समूह र एमालेले कार्यक्रम बिथोल्न अथक प्रयास गरिरहेको खबर पाएँ ।’

विगतमा पनि देशका लागि लडेर आएको स्मरण गराउँदै गुरुङले विपक्षीहरूको अवरोधले आफ्नो अभियान नरोकिने स्पष्ट पारेका छन् । साथै उनले कसैसँग सामना गर्न आफूहरू पछि नहट्ने चेतावनी समेत दिएका छन् ।

‘हामी हिजो देशका लागि लडेर आएका हौँ, आज अरू कसैसँग सामना गर्न डराउने प्रश्नै छैन,’ उनले भनेका छन्, ‘हामी सधैं सत्य र देशको पक्ष उभिन्छौँ।’ गुरुङले युवाहरूको आवाजसँग जोडिएर आफूहरू अझ बलियो हुने र गर्वका साथ झण्डा उठाएर पोखरा प्रवेश गर्ने बताएका छन् ।