किन फर्किए शेरबहादुर तामाङ दम्पत्ति ओली समूहमा ?

काठमाडौं । प्रतिनिधिसभा बिघटनपछि मन्त्रिमण्डल विस्तार हुने केही दिनअघिसम्म ओली समूहमा लागेका पूर्वकानुन मन्त्री शेरबहादुर तामाङ केही दिनमै पुनः प्रचण्ड माधव समूहमै फर्र्किएका थिए । मन्त्रीमण्डलमा सिन्धुपाल्चोकको आफ्नै क्षेत्रको एक प्रदेशबाट कांग्रेससँग पराजीत दावा लामालाई मन्त्री बनाउने निश्चित भएपछि उनी पुनः नेकपा प्रचण्ड–माधव समूहमा फर्किएका थिए ।

प्रचण्ड–माधव समूहमा उनी फर्किनुमा श्रीमती उषाकला राईको पनि जोडबल थियो । यसबीचमा ओली पक्षले प्रदेश नम्बर १ को सरकारबिरुद्ध अविश्वास प्रस्ताव निस्तेज वार्न प्रचण्ड–माधव पक्षमा लागेका एक एक सांसद खरिद बिक्रीको शृंखला सुरु गरिरहेको छ ।

प्रदेश सभामा दर्ता भएको अविश्वास प्रस्तावको बारेमा निर्णय नगरी महिना दिनदेखि सांसद आफ्नो पक्षमा तान्ने ओली समूहको प्रयास जारी छ । प्रचण्ड माधव समूहमा लागेका सांसदहरु गोपालचन्द्र बुढाथोकी, जसमाया गजमेरलाई आफ्नो पक्षमा ल्याएका मुख्यमन्त्री शेरधन राईको समूह त्यति गर्दा पनि संसदीय दलमा अल्पमतमा परेपछि उषाकला राईलाई प्रभावमा पार्न सफल भएको छ ।

प्रदेश सभामा शेरधनको पक्षमा लाग्दा उषाकला राईलाई मन्त्री पद दिइने आश्वासन दिइएको छ । प्रदेशको मन्त्री पद पाउने भएपछि उषाकला पनि ओली पक्षमा लाग्न सहमत भइन् । शेरबहादुर तामाङ त पहिले नै ओली समूहमा लागिसकेका थिए । श्रीमतीकै जोडले फर्किएका उनी अहिले पुनः ओली समूहमा लागेका छन् ।

आज बिराटनगरमा आयोजित कार्यक्रममा उषाकला राई ओली समूहमा औपचारिक रुपमा प्रवेश गर्ने भएकी छन् । ओली समूहमा शेरबहादुर तामाङको रिइन्ट्रीलाई श्रीमतीको मन्त्री पद प्राप्तीसँग जोडेर हेरिएको छ ।

त्यसो त शेरबहादुरले केही दिनदेखि नै सिन्धुपाल्चोकका आफ्ना निकट कार्यकर्तालाई ओली समूहतिर लाग्न सकेत गरिसकेका थिए ।