जेनजी आन्दोलनमा टीओबीको संलग्नताबारे प्रहरी अनुसन्धान जारी, तेन्जिनको बयानमा के छ ?

काठमाडौं । गएको भदौ २३ र २४ गतेको जेनजी आन्दोलनका क्रममा टीओबी समूहको गतिविधिबारे नेपाल प्रहरीले विस्तृत अनुसन्धान अगाडि बढाएको छ ।

जिल्ला प्रहरी परिसर काठमाडौंले सोमबार पत्रकार सम्मेलन गर्दै समूहका मुख्य व्यक्ति मानिएका तेन्जिन दावा लामा हालसम्म पनि प्रहरी हिरासतमै रहेका छन् । उनी उनीसँग सम्बन्धित प्रमाणहरूको विश्लेषण जारी रहेको जानकारी दिएको हो ।

प्रहरी उपरीक्षक तथा परिसरका प्रवक्ता पवनकुमार भट्टराईका अनुसार, टीओबी समूहले प्रयोग गरेको लोगो स्वयं तेन्जिनले नै डिजाइन गरेको तथ्य खुलेको छ ।

भदौ २३ गते दिउँसो बिजुलीबजार क्षेत्रमा मोटरसाइकल पड्काउँदै नारा जुलुस गर्नुका साथै भिडलाई उत्तेजित गर्ने गतिविधि त्यस समूहका सदस्यहरूले गरेको प्रहरीको दाबी छ ।

प्रहरीका अनुसार, बयानका क्रममा तेन्जिनले आफूलाई ‘आधा तिब्बतीयन’ भएको उल्लेख गरेका छन्, तर समूहमा सहभागी अन्य सदस्य भने सबै नेपाली मूलका रहेको खुलेको छ ।
भिडमा गएर उत्तेजित गर्ने गल्ती गरेको स्वीकारोक्ति तेन्जिनबाट लिखितरूपमै लिइएको प्रवक्ता भट्टराईले बताए ।