एनपीएल: आज विराटनगर र जनकपुर, कर्णाली र सुदूरपश्चिम प्रतिस्पर्धा गर्दै

काठमाडौं। दोस्रो संस्करणको नेपाल प्रिमियर लिगमा आज दुई खेल हुँदैछन्। त्रिवि मैदान कीर्तिपुरमा पहिलो खेल पौने १२ बजे र दोस्रो खेल अपराह्न ४ बजे सुरु हुनेछ।

पहिलो खेलमा विराटनगर किंग्स र जनकपुर बोल्ट्स, दोस्रो खेलमा कर्णाली याक्स र सुदूरपश्चिम रोयल्स प्रतिस्पर्धा गर्दैछन्।

२/२ खेल खेल्दा सुदूरपश्चिम र विराटनगर ४/४ अंकसहित तालिकाको पहिलो र दोस्रो स्थानमा छन्। कर्णालीले २ अंक जोडेको छ भने एक खेलमात्र खेलेको जनकपुर अंकविहीन छ।

गत संस्करण उद्घाटन खेलमा विराटनगर र जनकपुरबिच प्रतिस्पर्धा भएको थियो। जसमा जनकपुर ८ विकेटले विजयी भएको थियो । यसैगरी पहिलो संस्करणमा सुदूरपश्चिमले कर्णालीलाई ६ विकेटले पराजित गरेको थियो।

मंसिर १ गतेदेखि सुरु भएर २७ गतेसम्म सञ्चालन हुने एनपीएलमा ३२ खेल हुने कार्यतालिका छ। एनपीएलमा विराटनगर किंग्स, जनकपुर बोल्टस, चितवन राइनोज, काठमाडौं गोर्खाज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्स गरेर ८ फ्रेन्चाइज टोली छन्। पहिलो संस्करणमा जनकपुर बिजेता र सुदूरपश्चिम उपविजेता बनेको थियो।