ओली सरकारमा बादल, रायमाझी र भट्टः फड्के किनाराका साक्षीमात्र

काठमाडौं । प्रधानमन्त्री केपी ओलीले पूर्वमाओवादीका रामबहादुर थापा ‘बादल’ समूहलाई पार्टीदेखि राज्यका नियुक्तिमा पेल्दै लगेका छन् । ओलीले ११ सय केन्द्रीय सदस्य बनाउँदा बादल समूहका २२ जनामात्र राखेका छन् ।

बादलसहितका पूर्वमाओवादीलाई पार्टीका हरेक कमिटी र राज्यका नियुक्तिमा सम्मानजनक हिस्सा दिने सहमति गरेका ओलीले धोका दिएका छन् । बागमती प्रदेश कमिटीको अध्यक्ष ओलीले आनन्द पोखरेललाई बनाएका छन् भने सचिव खेम लोहनी भएका छन् । जबकि बादलले बागमती प्रदेश कमिटीको सचिवमा सिन्धुपाल्चोकका राजकुमार श्रेष्ठलाई बनाउने आश्वासन दिएका थिए ।

बादलले पूर्वमाओवादीभित्र डा.बाबुराम भट्टराईको समूहमा लागेर पेलिएका र सिन्धुपाल्चोकको भूगोलमा अग्नि सापकोटाका दाजुभाइको षडयन्त्रको शिकार भएका राजकुमार श्रेष्ठलाई दाबा लामाको ठाउँमा मन्त्री नै बनाउन खोजेका थिए । मन्त्रीमा दाबा भए पनि पार्टीमा सम्मानजनक स्थान दिने आश्वासन दिए तर त्यो पनि नदिएपछि बादल रुष्ट भएका छन् ।

बादलले ओलीले पेल्दै लगेपछि पूर्वमाओवादीका टोपबहादुर रायमाझीसँग सल्लाह गर्न थालेका छन् । ७७ जिल्लामा गठन गरिएको भूमि आयोगमा पनि ओलीले बादल पक्षलाई पूरै माइनस गरी आफ्नै गुटका मात्र भर्ति गरेका छन् । पछिल्ला दिनमा भएका भूमि आयोग, युवापरिषददेखि वीमा समिति, पर्यटन बोर्ड जस्ता नियुक्तिमा पनि पूर्वमाओवादी पृष्ठभूमिका कसैले पनि भाग पाएका छैनन् ।

ओलीले पूर्वमाओवादीबाट आएका बादलसहितका टोपबहादुर रायमाझी, लेखराज भट्टहरुलाई पार्टीका कमिटीदेखि भातृसंगठनमा समेत पेलेका छन् । 
युवासंघको ५० भन्दा बढी पदाधिकारी बनाउँदा बादल समूहलाई कुनै पनि स्थान दिइएको छैन । युवासंघको दोस्रो भेला नै बादल समूहले बहिस्कार गरेको थियो । बादल समूहले बहिस्कार गरे पनि युवासंघको भेलाले बचनबहादुर सिंहलाई अध्यक्ष बनाएर ओली गुटमा लागेकाहरुलाई मात्र पदाधिकारी राखी कमिटी घोषणा गरिसकिएको छ । जुन कमिटी घोषणाले बादल समूहका युवाहरु आक्रोसित भएका छन् । र, ओली समूहले पूर्वमाओवादीलाई हदैसम्म पेलेको महसुस गरेका छन् । ओली युवासंघका नेताहरुले बादल समूहलाई आउने भए ५० पदाधिकारीमा १–२ जना दिने अभिब्यक्ति दिइरहेका छन् ।

यसैबीच, प्रधानमन्त्री ओलीले नेकपा फुटका मुख्य कारक मानिएका वामदेव गौतमलाई गृहमन्त्रीसहित उपप्रधानमन्त्री बन्न प्रस्ताव गरेको कुरा सार्वजनिक भएपछि त बादल झस्किएका छन् । गृहमन्त्रीकै लोभले ओली समूहलाई साथ दिएका बादल त्यही गुम्ने भएपछि अहिले ओली समूहलाई साथ दिएकोमा पछुतो मान्न छाडेका छन् । नेकपा विभाजन हुनुअघिसम्म बादललाई साथ दिएका सूर्य सुवेदी पथिकले गाँस छाड्नु साथ नछाड्नु भनेका थिए । तर बादल साथ भन्दा गाँसमै रमाएर विगतमा जनयुद्ध सँगै लडेका सहकर्मीहरुतिर नलागी ओलीको प्रतिगमनमा साथ दिन पुगेका थिए ।

छोरा प्रतीक थापाले प्रहरीका सरुवा बढुवादेखि ठेक्कापट्टामा गरेका लेनदेनको बिषयमा ओलीहरुले भिडियोदेखि अडियो रेकर्ड राखेकाले पनि बादल त्यो गुट छाड्न सक्ने अवस्थामा थिएनन् । ओलीले बादललाई सुरुमा दुई अध्यक्षमध्ये एक दिने आश्वासन दिए, त्यतिले नपुगेर पार्टीमा इश्वर पोखरेल र उनलाई समान पोर्टफोलियो दिने भने । तर त्यसबिपरीत बादललाई तेस्रो बरियतामा राख्दैआएका छन् । प्रहरीका सरुवा बढुवामा पनि बादलको केही नचल्ने भएको छ ।

राज्यका हरेक अंगमा ओलीको हालीमुहाली हुने र बादलहरु फड्के किनाराका साक्षी मात्र भएका छन् ।  उनीहरुलाई सम्मानजनक स्थान दिने आश्वासन दिएर ओलीले मन्त्री त दिए, तर मन्त्रालय बालुटारबाटै चलाएका छन् । बादल, रायमाझीहरु गाडी चढ्ने, तलब खानेमै सीमित छन् । पूर्वमाओवादीका मन्त्रीहरुलाई ठूला आश्वासन दिएर प्रचण्डको साथबाट आफूतिर ल्याएर महाभारतमा सकुनीले कपटपूर्ण जुवामा हराएजस्तै बनाइदिएका छन् ।

ओलीले सत्तामा बाँडीचुँडी खाउँला भनेर ल्याए, तर खानेबेलामा भने आफू र आफ्नालाई मात्र दिएको महसुस माओवादी पृष्ठभूमिका मन्त्रीहरुले गर्न थालिसकेका छन् । विद्युत प्राधिकरणमा रायमाझीलाई समेत थाहा नदिई हितेन्द्रदेव शाक्यलाई ओलीले कार्यकारी निर्देशक सुटुक्क बनाएरै देखाएका छन् ।