महाधिवेशन भदौमा गर्ने देउवाको प्रस्ताव, पौडेल–सिटौला समूहको बिरोध देखावटीमात्रै

 

काठमाडौं । नेपाली कांग्रेसको १४ औं महाधिवेशन २०७८ भदौमा गर्ने प्रस्ताव पेस भएको छ । केन्द्रीय कार्यसमितिको बैठकमा सभापति शेरबहादुर देउवाको निर्देशनमा महामन्त्री पूर्णबहादुर खड्कले पार्टीको महाधिवेशन भदौमा गर्ने प्रस्ताव पेश गरेका हुन् ।

पार्टीको बिधान अनुसार महाधिवेशन फागुनभित्र गर्नुपर्ने हो । तर पटक पटक महाधिवेशन सार्दैआएको कांग्रेसले संविधान अनुसार पुनः ६ महिना बढाएर भदौमा गर्ने प्रस्ताव राखेको छ । सभापति शेरबहादुर देउवा भदौमा पनि महाधिवेशन गर्ने पक्षमा नभएकाले उनले यसबीचमा कुनै एक सानो पार्टीसँग एकता गर्न खोजिरहेका छन् । अर्को पार्टीसँग एकता गरेपछि महाधिवेशन भदौमा गर्नु पर्ने बाध्यत नहुने भएकाले पनि उनी यो चोरबाटोबाट सभापति पदमा अझै केही बर्ष रहने योजनामा रहेका छन् ।

देउवा महाधिवेशन फागुनमा गर्ने पक्षमा थिएनन् । उनले भदौमा गर्ने प्रस्ताव राखिसकेका छन् । र, पार्टीमा बहुमत भएकाले उनको त्यो प्रस्ताव बिहीबारको बैठकमा पारित पनि हुनेछ । केन्द्रीय कार्यसमितिको आजको बैठकमा महाधिवेशन सार्ने कुराको बिरोधमा रामचन्द्र पौडेल र कृष्णप्रसाद सिटौला देखिए । तर उनीहरु पनि महाधिवेशन गर्ने पक्षमा साँच्चिकै लागेका थिएनन् । उनीहरुलाई  पनि फागुनमा महाधिवेशन हुने विश्वास नरहेको देखिएको छ ।

पौडेल–सिटौला पक्षनिकट जिल्लाका कांग्रेस सभापतिहरुले पनि क्रियाशील सदस्यताको विवरण समयमा बुझाउन सकेका छैनन् । पौडेल–सिटौला पक्षमाथि  बाहिर देखाउन मात्र महाधिवेशन भदौमा सार्ने प्रस्तावको बिरोधमा उत्रिएको आरोप छ । आफूनिकट जिल्ला अध्यक्षहरुले समयमा क्रियाशील सदस्यता बुझाए नबुझाएकोबारेमा चासो नराख्ने पौडेल–सिटौलाको बिरोध देखावटी मात्र भएको देखिन्छ ।

बुधबारबाट सुरु भएको केन्द्रीय कार्यसमितिको बैठकको बारेमा पत्रकारहरुलाई जानकारी गराउँदै कांग्रेस प्रवक्ता विश्वप्रकाश शर्माले २०७८ भदौ ७, ८, ९ र १० गते केन्द्रीय महाधिवेसन काठमाडौंमा गर्ने प्रस्ताव पेस भएको बताए ।