वैवाहिक बलात्कार अभियोगमा कैद भुक्तान गरी घर फर्किएकै दिन विकले गरे श्रीमतीको हत्या

काठमाडौं । पर्वतको मोदी गाउँपालिका–६ दराकमा कागारबाट छुटेकै दिन एक व्यक्तिले श्रीमतीको हत्या गरेका छन् । गएराति मोदी–६ दराकका ५१ वर्षीय जीतबहादुर विकले ५२ वर्षीया श्रीमती सीतालाई कुटपिट गरी हत्या गरेका हुन् ।

कुटपिटबाट बेहोस अवस्थामा रहेकी सीतालाई प्रहरीले उद्धार गरी गएराति नै प्रदेश अस्पताल पुर्याएको थियो । तर, टाउको र अनुहारमा चोट लागेकी सीतालाई अस्पताल पर्याउँदा चिकित्सकले मृत घोषणा गरेको पर्वतका प्रहरी निरीक्षक सुदीप भण्डारीले जानकारी दिए ।

कुटपिटको घटनापछि जीतबहादुरलाई प्रहरीले पक्राउ गरेको छ । अभियुक्त जीतबहादुर वैवाहिक जबर्जस्ती करणी अभियोगमा कैद भुक्तान गरी सोमबार नै धरौटीमा छुटेका थिए ।

श्रीमतीले नै धरौटी तिरेर उनलाई छुटाएकी थिइन् । तर, घर पुगेकै दिन साँझ खाना खाइसकेपछि श्रीमतीमाथि जाइलागेको प्रहरीले जनाएको छ । उनका तीन छोरा रोजगारीका लागि विदेशमा छन् भने घरमा बुहारीसहित चार जना बस्दै आएका थिए । घटनाका बारेमा थप अनुसन्धान भइरहेको प्रहरीले जनाएको छ ।