बाँके प्रहरीमा काजवालाकै राज, आकर्षक चौकीमा इन्चार्ज

नेपालगञ्ज । बाँकेमा दरबन्दी अन्यत्र भएका र काजमा कार्यरत प्रहरीलाई मातहतका थाना चौकीमा इन्चार्जको जिम्मेवारी दिइएको छ ।

दुई दिनपछि नेपाल प्रहरी महानिरीक्षकको पदभार सम्हाल्न लागेका दानबहादुर कार्कीले लुम्बिनी प्रदेश प्रमुख(डीआईजी) हुँदा काजमा कार्यरत प्रहरीलाई इन्चार्ज नदिने नीति कार्यान्वयन गर्दै दरबन्दीमा फिर्ता गरेका थिए । तर कार्की एआईजीमा बढुवा भएपछि कार्की लुम्बिनीबाट काठमाडौं फर्किनासाथ काजमा कार्यरत प्रहरीलाई इन्चार्ज बनाइएको छ ।

काजमा कार्यरत असई सुनिल शाहलाई बाँकेको नगर भवन प्रहरी चौकीको इन्चार्जको जिम्मा दिइएको छ । बरिष्ठ सई भोजराज केसी साईगाउँ नाकाका इन्चार्ज छन् । सई बिष्णु शाहीलाई नेपालगञ्ज बसपार्कको इन्चार्जका रुपमा कार्यरत रहेका छन् ।

नगर भवन चौकी असईका लागि आकर्षक मानिन्छ । साईगाउँ नाका रहेको चौकी हो । बसपार्क त झन् ठूलो र राम्रो ठाउँका रुपमा लिने गरिएको छ । यी तीनै जना जुनियर अधिकृतको बाँकेभन्दा बाहिर भए पनि यिनलाई इन्चार्ज दिइएको छ ।

आईजीपी नियुक्ति भइसकेका दानबहादुर कार्कीले काजमा कार्यरतलाई इन्चार्ज नदिने नीति कार्यान्वयन मात्र गरेका थिएनन्, दरबन्दी फिर्ता अभियान चलाएका थिए ।

त्यसैअन्तर्गत हाल बसपार्कमा रहेका बरिष्ठ सई बिष्णु शाहीलाई उनको दरबन्दी रहेको बर्दिया पठाएका थिए । जब उनी एआईजीमा बढुवा भएर काठमाडौं आए, आइसकेपछि प्रहरीभित्र रातो क्याप भनेर चिनिने राजेश सुधाकर नामका बिचौलियामार्फत् फेरि बाँकेमा काजमा आए ।

बाँकेमा काजसरुवा हुनासाथ तत्कालीन एसपी रामप्रसाद घर्तीले सुधाकरमार्फत् मिलाएर उनलाई बसपार्कको इन्चार्जमा खटाएका हुन् । यी तीन थाना चौकीमात्र होइन, बाँके जिल्लामातहतका अन्य नाकाहरुमा पनि काजमा कार्यरतहरुलाई नै खटाइएको छ । जिल्ला प्रहरी कार्यालय बाँकेको प्रमुख हाल एसपी अंगुर जीसी छन् ।