संसद् विघटन विरूद्ध कांग्रेसद्वारा देशभर प्रदर्शनः देउवाले बुटवल, विश्वप्रकाशले ललितपुर र गगनले चितवनको सभालाई सम्बोधन गर्ने

काठमाडौं । नेपाली कांग्रेसले आज संसद विघटनविरूद्ध देशैभर प्रदर्शन गर्दैछ । केपी शर्मा ओलीको कदमविरुद्ध कांग्रेसले जिल्ला–जिल्लामा विरोध प्रदर्शन गर्न लागेको हो ।

जिल्लामा प्रदर्शनपछि हुने विरोध सभालाई कांग्रेसका शीर्ष नेताले सम्बोधन गर्नेछन् । पूर्व निर्धारित कार्यक्रमअनुसार सभापति शेरबहादुर देउवाले बुटवलमा हुने सभालाई सम्बोधन गर्नेछन् ।

यस्तै, वरिष्ठ नेता रामचन्द्र पौडेल र सहमहामन्त्री प्रकाशसरण महत धादिङ, उपसभापति विमलेन्द्र निधि सप्तरी, महामन्त्री शशांक कोइरालाले दाङको सभालाई सम्बोधन गर्नेछन् ।

यसैगरी पूर्वमहामन्त्री कृष्णप्रसाद सिटौलाले झापा, पूर्वमहामन्त्री प्रकाशमान सिंहले कास्कीको पोखरा, डा. शेखर कोइरालाले सुनसरीको धरान, अर्जुननरसिंह केसीले काठमाडौं, डा.मिनेन्द्र रिजालले प्यूठान, डा. रामशरण महतले काभ्रे, प्रवक्ता विश्वप्रकाश शर्माले ललितपुर, गगन थापाले चितवन, प्रदीप पौडेलले दैलेख, अर्जुन जोशीले भक्तपुर, गुरुराज घिमिरेले दोलखाको विरोध सभालाई सम्बोधन गर्ने कांग्रेसले जनाएकाे छ।

संसद विघटनको कदमलाई असंवैधानिक र अलोकतान्त्रिक ठहर गरेको कांग्रेसले यसअघि पुस १३ देखि माघ २४ गतेसम्मको अवधिमा विरोध प्रदर्शन गरेको थियो । आज हुने प्रदर्शनलाई पनि घरघरबाट सहभागी भएर सफल पार्न सभापति देउवाले अपिल गरेका छन् ।