रामकुमारी झाँक्रीलाई गैरकानूनी रूपमा पक्राउ गरिएकाे भन्दै सर्वाेच्चमा रिट !

काठमाडाैं । नेपाल कम्युनिस्ट पार्टी (नेकपा) प्रचण्ड-नेपाल समूहकी नेतृ रामकुमारी झाँक्रीलाई गैरकानुनी रूपमा पक्राउ गरिएकाे भन्दै सर्वाेच्च अदालतमा रिट दायर गर्न लागिएकाे छ । 

अधिवक्ताद्वय राधिका खतिवडा र गुणराज आचार्यले झाँक्रीलाई गैरकानुनी रूपमा पक्राउ गरिएकाे भन्दै रिट निबेदन दर्ता गराउन लागेका हुन् ।

झाँक्रीले गोरखामा राष्ट्रपति विद्या भण्डारीलाई बडामहारानीको संज्ञा दिंदै भनेकी थिइन्–‘राष्ट्रपतिका कुरा त के गर्नु, म बडामहारानीलाई गोरखाबाटै सन्देश दिन चाहन्छु निर्वाचनको तयारीका लागि सुविधा छाडेर आउनुस् ।

शीतलनिवास छाडेर पहिला कोटेश्वर आउनुस्, चावहिल कि कता बानेश्वरतिर बसाइ छ भन्ने सुन्या छु,’ झाँक्रीले भनेकी थिइन्–‘होइन भने बालकोटै गए पनि हुन्छ ।’

यो अभिब्यक्तिपछि झाँक्रीलाई कारबाही गर्न माग गर्दै ओली निकट अनेमसंघले माघ २१ मा गृहमन्त्रीलाई ज्ञापनपत्र बुझाएका थिए ।

राज्य विरूद्ध कसूर गरेकाे भन्दै नेतृ झाँक्रीलाई बिहीबार दिउँसाे प्रहरीले पक्राउ गरेकाे छ । त्यसकाे बिराेधमा नेकपा नेता कार्यकर्ताहरूले नेतृ झाँक्रीकै घर अगाडि चर्काे नाराबाजी गरेका छन् ।