नेकपा (प्रचण्ड–माधव) समूहको बृहत् बिरोध प्रदर्शन, २ लाख नागरिक उतार्ने तयारी

काठमाडौं । प्रतिनिधिसभा बिघटनको बिरोध गर्दै नेकपा(प्रचण्ड–माधव) समूहले आज राजधानीमा बृहत् जनप्रदर्शन गर्दैछ । नेकपाले बृहत् जनप्रदर्शनका लागि काठमाडौं उपत्यकाका पाँच ठाउँबाट बिरोध जुलुस प्रदर्शन गर्ने भएको छ । ती जुलुसको नेतृत्व गर्नका लागि पार्टीले जिम्मेवारी पनि तोकेको छ । 

नेकपाको केन्द्रीय संघर्ष समितिले मंगलबार जारी गरेको विज्ञप्तिअनुसार विरोध प्रदर्शन र सभाका लागि सुन्धाराबाट मध्याह्न १२ बजे मूल जुलुस निस्कने छ । संघर्ष समितिका अनुसार पुल्चोकबाट निस्कने जुलुसको नेतृत्व कृष्णबहादुर महरा, पम्फा भुसाल, रघुजी पन्त, प्रमेश हमाल तथा संघ–प्रदेशका सांसदहरुले गर्नेछन् ।

त्यस्तै त्रिपुरेश्वरबाट निस्कने जुलुसको नेतृत्व अष्टलक्ष्मी शाक्य, घनश्याम भुसाल, चक्रपाणि खनाल, जनार्दन शर्मा, मुकन्द न्यौपाने, युवराज ज्ञवाली, वर्षमान पुन, सुरेन्द्र पाण्डे, विष्णुपुकार श्रेष्ठ, केन्द्रीय कमिटी सदस्यहरु, सम्बन्धित प्रदेश कमिटी, संघ तथा प्रदेशका सांसदहरुले गर्नेछन् ।

माइतीघरबाट निस्कने जुलुसको नेतृत्व नेताहरु अमृतकुमार बोहोरा, गणेश शाह, गिरिराजमणि पोखरेल, भीम आचार्य, मातृका यादव, हरिबोल गजुरेल, केन्द्रीय कमिटी सदस्यहरु सम्बन्धित प्रदेश कमिटी, संघ तथा प्रदेशका सांसदहरूलाई दिइएको नेकपाले जनाएको छ ।

केशरमहलबाट सुरु हुने जुलुसको नेतृत्व नेताहरु देवप्रसाद गुरुङ, देवेन्द्र पौडेल, भीम रावल, शक्तिबहादुर बस्नेत, केन्द्रीय कमिटी सदस्यहरु, सम्बन्धित प्रदेश कमिटीका सदस्यहरु, संघ तथा प्रदेशका सांसदहरुले गर्नेछन् ।

जमलबाट निस्कने जुलुसमा लीलामणि पोखरेल, केन्द्रीय कमिटी सदस्यहरु, पेसागत संगठन हेर्ने केन्द्रीय सदस्यहरु, पेसागत संगठन हेर्ने केन्द्रीय सदस्यहरुले गर्ने संघर्ष समितिले जनाएको छ । जुलुसपछि सभा हुने बताइएको छ । सभालाई पुष्पकमल दाहाल प्रचण्ड, माधवकुमार नेपाललगायत नेताहरुले संबोधन गर्ने छन् । नेकपाका दुबै समूह शक्ति प्रदर्शनका नाममा देशैभर सभा तथा जुलुस गर्दै आएका छन् ।

नेकपाको आजको प्रदर्शनमा दुई लाख नागरिक उतार्ने दाबी उक्त पार्टीका बरिष्ठ नेता झलनाथ खनालले गरेका छन् । नेकपाले यसअघि पनि काठमाडौंमा विरोधका विभिन्न कार्यक्रमहरु गरिसकेको छ । पछिल्लो पटक प्रधानमन्त्री ओलीले संवैधानिक निकायका नियुक्ति जबर्जस्ती गरेपछि नेकपा(प्रचण्ड–माधव) समूहले एक दिने आमह्ताल गरेको थियो । देशका प्रायः सबै प्रदेशमा बिरोधका कार्यक्रम सम्पन्न गरिसकेको छ ।