नेकपा ओली समूहकाे आमसभा सुरू, प्रधानमन्त्री, गृहमन्त्रीसहितका शीर्ष नेताले सम्बोधन गर्ने

काठमाडौं । नेपाल कम्युनिस्ट पार्टी (नेकपा) ओली समूहले आयोजन गरेको आमसभा सुरू भएको छ। दरबारमार्गस्थित नारायणहिटी संग्रहालय अगाडिको सडकमा हुने आमसभा अगाडि विभिन्‍न स्थानबाट जुलुस निकालिएकाे थियाे ।

भेलाअघि गौशाला, ज्ञानेश्वर, सोह्रखुट्टे, लैनचौर, प्रदशनीमार्ग, नयाँसडक बागबजार, त्रिपुरेश्वर, पुतलीसडक, भद्रकाली, रत्नपार्क, नयाँ बानेश्वर र माइतीघरबाट जुलुस निकालिएको छ। जुलुस सभास्थल नारायणहिटी दरबार अगाडि गएर सभामा परिणत भएकाे थियाे ।

‘अराजकताको अन्त्य, भौगोलिक अखण्डता, संविधानको रक्षा गर्दै विकास र समृद्धिमार्फत राजनीतिक स्थायित्वका लागि ताजा जनादेश’ भन्ने नाराका साथ आज बृहतसभा गर्न थालिएको हो।

सभालाई पार्टी अध्यक्ष तथा प्रधानमन्त्री ओलीसहित गृहमन्त्री रामबहादुर थापा, स्थायी कमिटी सदस्य सत्यनारायण मण्डललगायत नेताले सम्बोधन गर्नेछन्।