४ करोड २५ लाख र १० किलो सुनसहित पक्राउ परेका श्रेष्ठलाई राजश्व विभागमा पठाइने

काठमाडौं । काठमाडौंको गोङ्गबुबाट बरामद भएको रकम ४ करोड बढी रहेको पुष्टि भएको छ ।

नेपाल प्रहरीका अनुसार मंगलबार रातिसम्म गरेको गणनामा बरामद रकम ४ करोड २५ लाख ५० हजार रुपैयाँ रहेको पाइएको हो। त्यस्तै ९ किलो ३९ ग्राम सुनका गहना र ३ किलो २१ ग्राम चाँदीका गहना पनि प्रहरीले बरामद गरेको छ ।

काठमाडौँ परिसरका प्रवक्ता एसपी अपीलराज बोहराले बरामद भएको रकम ४ करोड २५ लाख ५० हजार र ९ किलो ३९ ग्राम सुन र ३ किलो २१ ग्राम चाँदीका गहना बरामद गरिएको जानकारी दिए ।

काठमाडौँ महानगरपालिका–२६ गोङ्गबुस्थित ७६ वर्षीय विनोदकुमार श्रेष्ठको घरमा नगद र सुन रहेको जानकारी पछि प्रहरीले छापा मारेको थियो ।

श्रेष्ठको घरमा अवैध रुपमा लुकाएर राखिएको नगद र सुन प्रहरीले बरामद गरेको थियो । यी गहना धितोमा राखेर उनले मिटरब्याजमा रकम लेनदेन गर्ने खुलेको छ ।

नगद र सुनसहित पक्राउ परेका विनोदकुमार श्रेष्ठलाई राजश्व अनुसन्धान विभागमा पठाइने भएको छ । बरामद रकम र सुनसहित श्रेष्ठलाई राजश्व अनुसन्धान विभाग हरिहर भवन पठाउने लागेको एसपी बोहराले बताए ।

श्रेष्ठको कसुर प्रहरीले भन्दा पनि विभागले हेर्ने किसिमको रहेकाले त्यहाँ पठाउन लागिएको एसपी बोहराले बताए ।