बानेश्वरमा झलनाथ-घनश्याम पक्षीय नेताहरूको छुट्टै भेला

काठमाडौं । नेकपा एकीकृत समाजवादीका सम्मानित नेता झलनाथ खनाल र उपमहासचिव घनश्याम भुसाल पक्षीय नेताहरूको छुट्टै भेला सुरु भएको छ ।

नयाँ बानेश्वरस्थित बानेश्वर क्याम्पसमा पार्टीको आगामी केन्द्रीय कमिटी र स्थायी कमिटी बैठकका एजेन्डा तय गर्न यो छलफल आयोजना गरिएको हो । बैठकमा स्थायी कमिटी सदस्य हरि पराजुली, पोलिटब्यूरो सदस्यहरू लक्ष्मण लम्साल र नरेशकुमार शाही, केन्द्रीय सदस्यहरू सुशील भट्टराई र मनाकुमारी साउदलगायत सहभागी छन् ।

भेलाको अगुवाइ पूर्वमन्त्री तथा पार्टीका पूर्वसचिव जीवनराम श्रेष्ठले गरेका छन् । पछिल्लो समय पार्टी अध्यक्ष माधवकुमार नेपाल र झलनाथ खनालबीच असमझदारी बढेको छ ।

अध्यक्ष नेपालको कार्यशैलीलाई निरङ्कुश भन्दै उनको पक्षमा नरहेका नेता-कार्यकर्तामाथि जिम्मेवारी खोस्ने वा जिम्मेवारीविहीन बनाउने प्रवृत्ति बढेको आरोप लागेको छ ।