एमालेका सांसद साहले मागे गृहमन्त्रीको राजीनामा

काठमाडौं । सत्तारुढ दल नेकपा एमालेका सांसद किरणकुमार साहले गृहमन्त्री रमेश लेखकको राजिनामा माग गरेका छन् । सांसद शाहले आज (शुक्रबार) को प्रतिनिधिसभा बैठकमा बोल्दै मुलुकमा सुशासन कायम हुन नसकेको बताएका छन् । उनले गृहमन्त्री लेखकले गृह मन्त्रालय चलाउन नसकेकाले राजिनामा दिन माग गरेका हुन् ।

शुक्रवार बसेको प्रतिनिधिसभा बैठकमा सांसद साहले मुलुकमा हत्या, लुटपाट जस्ता घटना बढिरहेको तथा कानुनको कार्यान्वयन गर्न सरकार असफल भएको भन्दै आफूलाई एक महिना गृह मन्त्रालय चलाउन दिन माग गरेका हुन् ।

‘म स्पष्ट भन्छु यो सबै गृहमन्त्रीको लापरबाही र कमजोरी हो । यदि गृहमन्त्रीसँग मन्त्रालय चलाउने क्षमता छैन भने त्यो मन्त्रालय मलाई दिनुस्’, साहले भने( ‘एक महिनाका लागि दिनुहोस् म देखाउँछु सुशासन, संविधान कार्यान्वयन र कानुनी शासन भनेको के हो ।’ उनले आफू त्यसो गर्दा सफल नभएमा सांसद पदबाट राजीनामा दिने समेत बताए ।