काठमाडौंका सार्वजनिक स्थलमा धुम्रपान गर्नेलाई ५ सय जरिवाना, क्युआर बोकेर हिँड्छन् नगर प्रहरी

काठमाडौं । काठमाडौं महानगरपालिका भित्रका सार्वजनिक स्थलमा धुम्रपान गर्नेहरूबाट जरिवाना लिन सुरू गरिएको छ।

महानगरले आइतबारदेखि कारबाही गर्न सुरू गरिएको हो। सार्वजनिक स्थानमा धुम्रपान गरेबापत् १७ जनाले ५ सय रूपैयाँका दरले जरिवाना बुझाएको नगर प्रहरी प्रमुख राजुनाथ पाण्डेले जानकारी दिए।

सार्वजनिक स्थानमा धुम्रपान गर्नेहरूबाट आइतबार ८ हजार ५०० रूपैयाँ जरिवाना उठेको उनले बताए।

कोही व्यक्तिले सार्वजनिक स्थानमा धुम्रपान गरेको भेटिँदा सो व्यक्तिलाई ठाउँको ठाउँ जरिवाना तिराउने गरिएको उनले बताए।

सूर्तीजन्य पदार्थ (नियन्‍त्रण र नियमन गर्ने) ऐन २०६८ लाई महानगरले कार्यान्वयन मात्र गर्न लागेको सहप्रवक्ता ध्रुव काफ्लेले बताए।