कोदारी राजमार्ग १२ दिनदेखि अवरुद्ध, ६ सय कन्टेनर सीमापारी रोकिए

काठमार्डां । पहिरोले कोदारी राजमार्ग अवरुद्ध हुँदा सागसब्जी र फलफूल बोकेका ६ सय कन्टेनर मितेरी पुलपारि रोकिएका छन्।

सिन्धुपाल्चोकको भोटेकोशी गाउँपालिका–२ इकुमा लेदोसहितको पहिरो खसेपछि १२ दिनदेखि कोदारी राजमार्ग अवरुद्ध छ।

पहिरो पन्छाउन नसक्दा सवारी साधनमात्र होइन पैदल हिँड्न पनि कठिन भएको नेपाल ट्रक कन्टेनर ढुवानी सेवाका अध्यक्ष अर्जुन सापकोटाले बताए। कोदारी राजमार्गको करिब दुई किलोमिटर क्षेत्र पहिरोले ढाकेको छ।

कन्टेनरका सामान भरियालाई बोकाएर पहिरो कटाउन थालिएको जानकारी सापकोटाले दिए। पहिरो पन्छाउने प्रयास सरकारीस्तरमा नभएको गुनासो उनको छ।

यसैबीच, चरिकोटस्थित सडक डिभिजन कार्यालयका प्रमुख अमितकुमार श्रेष्ठले निरन्तर लेदो बगेर सडक अवरुद्ध भएको बताए। लेदो बग्न रोकिना साथ भारी उपकरण प्रयोग गरेर बाटो खोलिने उनको भनाइ छ।