बाढी पहिरोका कारण देशका यी ७ वटा राजमार्ग पूर्ण अवरुद्ध

काठमाडौं । बाढीपहिरोले देशका सातवटा राजमार्ग पूर्ण रूपमा अवरुद्ध भएका छन् । प्रहरी प्रधान कार्यालयका अनुसार सात राजमार्ग पूर्ण अवरुद्ध हुँदा नौवटा सडकमा एकतर्फी मात्रै गाडी चलेका छन् ।

सङ्खुवासभाको भोटखोला गाउँपालिका–४ स्थित कोसी राजमार्ग, रसुवाको गोसाइँकुण्ड गाउँपालिकास्थित नेपाल–चीन नाका जोड्ने पुल र पासाङ ल्यामु सडक, सिन्धुपाल्चोकको भोटेकोसी गाउँपालिकास्थित अरनिको राजमार्ग, नवलपरासी पूर्वको विनयी त्रिवेणी गाउँपालिका–२ स्थित पूर्वपश्चिम राजमार्ग र लमजुङको मध्यनेपाल नगरपालिका–९ स्थित मध्यपहाडी लोकमार्ग आज पूर्णरूपमा अवरुद्ध अवस्थामा छन् ।

त्यस्तै काठमाडौँ–नुवाकोट सडक, तेह्रथुमको लालीगुराँस नगरपालिका– ७ स्थित मध्यपहाडी राजमार्ग, रसुवाको उत्तरगयास्थित गल्छी त्रिशूलीदेखि मैलुड स्याफ्रु जाने सडक, बागलुङको बागलुङ नगरपालिका– १० स्थित कालीगण्डकी करिडोर र बागलुङकै काठेखोला–६ स्थित मध्यपहाडी लोकमार्गमा एकतर्फी सडक सञ्चालन भएको छ ।

त्यसैगरी, नवलपरासी पूर्वको गैँडाकोट ३ स्थित कालीगण्डकी करिडोर, मुस्ताङको थासाङ गाउँपालिका– ४ स्थित बेनी–जोमसोम सडक, तनहुँको बन्दिपुर–४ चुनपहरास्थित पृथ्वी राजमार्ग, कास्कीको अन्नपूर्ण गाउँपालिका–६ स्थित पोखरा बागलुङ सडक, गुल्मीको रुरु–३ स्थित रिडी–तम्घास सडक, दाङको लमही नगरपालिका–९ स्थित राप्ती राजमार्ग र रोल्पाको परिवर्तन गाउँपालिकास्थित सहिद राजमार्गमा आज एकतर्फी रुपमा आलोपालो गरेर सवारी सञ्चालन भइरहेको प्रहरीले जनाएको छ ।