महेश बस्नेतले गगन थापालाई दिए ‘छट्टु कांग्रेस’को संज्ञा

काठमाडौं । नेपाल कम्युनिस्ट पार्टी (नेकपा) ओली समूहका नेता महेश बस्नेतले नेपाली कांग्रेसका युवा नेता गगन थापालाई ‘छट्टु कांग्रेस’को संज्ञा दिएका छन् ।

नेपाली रेडियो नेटवर्कमा आइतबार बिहान पत्रकार ऋषि धमलासँग कुरा गर्दै नेता बस्नेतले गगन थापा र रामचन्द्र पौडेलहरू निर्वाचन नै नगरी सत्तामा जाने खेलमा लागेको आरोप समेत लगाए ।

गगन र रामचन्द्रलाई निर्वाचनबाट प्रतिस्पर्धा गरेर जितेर आउन चुनौति दिंदै उनले भने–‘कांग्रेसभित्र ‘लड्डु कांग्रेस’ र ‘छट्टु कांग्रेस’ भनेर प्रचार गरिएको छ ।’

कांग्रेस निर्वाचनमा जाने मनस्थितिमा भए पनि रामचन्द्रजी र गगनजीले लड्डु कांग्रेसको ब्याख्या गर्दै निर्वाचन नजितिकन पुनःस्थापना गरेरै आफू सत्तामा जाने र कांग्रेसभित्रको महाधिवेशनबाट पार्टी कब्जा गर्ने मनसाय बोकेको उनको आरोप थियो ।

मुलुक निर्वाचनमा गइसकेको बताउँदै उनले भने–‘सर्वोच्च अदालतले एउटा फैसला दिन्छ । सबै शक्तिहरू सर्वोच्च अदालतको फैसला कुरेर बसेका छन् । सर्वोच्च अदालतले निर्वाचनको पक्षमा फैसला दियो भने निर्वाचनको माहोल बनिहाल्छ ।’