नेप्से परिसूचक ८.६२ अङ्कले बढ्यो, वेबसाइट डाउन

काठमाडौं । साताको दोस्रो कारोबार दिन नेप्से परिसूचक बढेर बन्द भएको छ । पछिल्लो तीन कारोबार दिनदेखि घटिरहेको नेप्से, यस दिन भने बढेर बन्द भएको हो । आज नेप्से परिसूचक ८.६२ अङ्क बढेको हो ।

यो सँगै नेप्से २८६७ बिन्दुमा पुगेको छ । गत मङ्गलवार ३००२ अङ्कसम्म पुगेको बजार लगातार तीन कारोबार दिन कुल १४४ अङ्क घट्दै हिजो आइतबार २८५८ मा झरेको थियो ।

तीन दिनपछि बढेको बजारमा कारोबार रकम घटेको छ । अघिल्लो दिन १३ अर्ब ७ करोडको कारोबार भएकोमा आज १० अर्ब ८२ करोडको भयो । १४० कम्पनीको मूल्य बढ्दा ११० को घट्यो ।

आज बैङ्किङ ०.६८ प्रतिशत बढ्यो । जीवन बीमा ०.४३, माइक्रोफाइनान्स ०।५६, हाइड्रोपावर ०.०९ प्रतिशत बढे । होटल तथा पर्यटन ०.३९, विकास बैङ्क ०.०६, अन्य ०.४२, उत्पादन तथा प्रशोधन ०.२१, निर्जीवन बीमा ०।५३ तथा फाइनान्स ०.८२ प्रतिशतले घटे ।

नेप्सेको वेबसाइट आज शेयर बजार बन्द भएको केही समयपछि नै डाउन भएको छ । जसका कारण लगानीकर्ता वास्तविक बजार तथ्याङ्क पाउनबाट वञ्चित भएका छन् ।

बजार बन्द भएको करिब २०-२२ मिनेटपछि सामान्यतः नेप्सेले दिनभरको वास्तविक कारोबार विवरण सार्वजनिक गर्ने गर्छ । तर, आज बजार बन्द भएको करिब १ घण्टा बितिसक्दा पनि वेबसाइट खुलेको छैन । यो समाचार तयार पार्दासम्म पनि नेप्सेको वेबसाइट खुल्न सकेको छैन ।