‘कुलिङ पिरियड’ छानबिन समितिको प्रतिवेदन आज संसद्‌मा पेस नहुने

काठमाडौं । निजामती सेवा विधेयकको ’कुलिङ पिरियड’ मा भएको हेरफेरबारे छानबिन गर्न गठित समितिले आज पनि प्रतिनिधिसभामा प्रतिवेदन पेस नगर्ने भएको छ । सभामुख, संसद् सचिवालय र छानबिन समिति सचिवालयले दिएको जानकारी अनुसार, आजको बैठकमा प्रतिवेदन पेस नहुने भएको हो ।

छानबिन गर्न दिइएको समयसीमा आइतबार सकिएकाले समितिले आजै निष्कर्षसहितको प्रतिवेदन प्रतिनिधिसभामा बुझाउने तयारी गरेको थियो । त्यसका लागि आइतबार राति अबेरसम्म बसेको बैठकबाट निष्कर्ष नआएपछि आज बिहानै ७ बजेदेखि समितिको बैठक बसको थियो ।

कुलिङ पिरियडको प्रावधान राख्ने गरी भएको सहमति निष्क्रिय हुने भाषासमेत निजामती विधेयकमा परेको विषयमा समिति सदस्यहरू कसलाई जिम्मेवार ठहर्‍याउने भन्ने छलफलमा छन् । खासगरी कुलिङ पिरियडमा त्रुटी कसरी भयो र त्यसमा कसैको संलग्नता भेटिए कस्तो कारबाही गर्ने भन्ने विषयमा समितिका सदस्यहरु साझा निष्कर्षमा पुग्न सकेका छैनन्।

समितिमा नेपाली कांग्रेसबाट सांसद जीवन परियार, सुशीला थिङ, नेकपा (एमाले) बाट नारायण आचार्य र ईश्वरी घर्ती तथा प्रतिपक्षी दल माओवादी केन्द्रबाट माधव सापकोटा, रास्वपाबाट गणेश पराजुली र राप्रपाबाट रोशन कार्की छन्।

कुलिङ पिरियडमा कर्मचारीलाई अवकाश वा राजीनामाको दुई वर्षसम्म नियुक्ति गर्न नमिल्ने व्यवस्था राखिएको थियो । तर, प्रतिनिधिसभाबाट विधेयक पारित हुँदा उक्त विषयमा हेरफेर भएको पाइएको थियो ।