‘आत्मालोचना गर्न तयार छु तर अध्यक्षले पनि जिम्मा लिनुपर्छ’- जनार्दन शर्मा

काठमाडौँ । नेकपा माओवादी केन्द्रका उपमहासचिव जनार्दन शर्मा ‘प्रभाकर’ले देश र जनताका लागि आफू आत्मालोचना मात्रै होइन जुनसुकै त्याग गर्न पनि तयार रहेको बताएका छन् ।

पार्टी स्थायी कमिटीको आइतबारको बैठकमा शर्माले तर त्यसका लागि अध्यक्ष पुष्पकमल दाहाल ‘प्रचण्ड’ पनि तयार हुनुपर्ने धारणा राखेका छन् ।

‘म देश र जनताका लागि आत्मालोचना मात्रै होइन जुनसुकै त्याग गर्न तयार छु,’ बैठकमा शर्माले राखेको भनाइ उधृत गर्दै स्रोतले भन्यो, ‘अध्यक्ष ‘प्रचण्ड’बाट उत्पन्न समस्याको जिम्मा उहाँ स्वयंले लिनुपर्छ, हामी सबै तयार नै छौँ ।

बैठकमा उपमहासचिव शर्माले सरकारबाट बाहिरिएपछि सुरु भएको सुशासनको अभियानलाई अध्यक्ष ‘प्रचण्ड’ले काँग्रेस र एमालेसँगको दुई बुँदे सहमतिमा लगेर बिसाएको आरोप लगाए ।

‘अध्यक्षज्यूले पार्टीको निर्णय विपरीत सरकारको खेलमा समय फाल्नुभयो,’ शर्माले भने, ‘सुशासनको अभियान २ बुँदेमा लिएर बिसाउनुभयो ।’

उपमहासचिव शर्माले वैचारिक लाइन, राजनीतिक अस्पष्टता, संगठनात्मक अराजकता, विधि र संगठनात्मक प्रणालीमा संकट लगायतका कारणले समस्या उत्पन्न भएको निष्कर्ष निकालेका छन् ।

शुक्रबारदेखि सुरु भएको माओवादी केन्द्रको स्थायी कमिटी बैठकमा शनिबारसम्म बोल्ने अधिकांश नेताहरूले शर्मालाई आत्मालोचना गर्न सुझाव दिएका थिए । पछिल्लो समय अध्यक्ष ‘प्रचण्ड’ र उपमहासचिव शर्माको अन्तरविरोध सतहमै देखिएको छ ।