बागमतीका मुख्यमन्त्री लामाले आज राजीनामा दिने

काठमाडौं । बागमती प्रदेशका मुख्यमन्त्री बहादुरसिंह लामाले आज (साउन १८ गते) पदबाट राजीनामा दिने भएका छन्। नेपाली कांग्रेस बागमती संसदीय दलको नेतामा पराजित मुख्यमन्त्री लामा आज पदबाट हट्ने भएका हुन्।

संसदीय दलको नेतामा इन्द्रबहादुर बानियाँ विजयी भएपछि दलभित्र र बाहिर दुवैतर्फको दबाबबीच पार्टीका सभापति शेरबहादुर देउवाले मार्गप्रशस्त गर्न निर्देशन दिएपछि लामा मुख्यमन्त्री पदबाट राजीनामा दिने निर्णयमा पुगेका हुन्।

शनिबार सभापति देउवाले निवासमा भएको छलफल पश्चात लामा पदबाट राजीनामा दिन तयार भएका थिए । त्यस क्रममा लामाले राखेका २ सर्त मान्न देउवाले बानियाँलाई पनि निर्देशन दिएको र उनी त्यसमा सहमत भएको छलफलमा सहभागी कांग्रेस प्रदेश संसदीय दलका उपनेता रामकृष्ण चित्रकारले जानकारी दिए।

लामाले आफूले नियुक्त गरेका तीन मन्त्रीलाई शपथ गराउनुपर्ने र नयाँ सरकार सञ्चालनमा आफ्नो पक्षसँग सहकार्य गर्नुपर्ने सर्त राखेका छन्। त्यसमा बानियाँ राजी भएपछि लामा राजीनामा दिन तयार भएको चित्रकारको भनाइ छ।

बिबादका बीच मुख्यमन्त्री लामाले साउन १४ गते प्रमुख सचेतक गोविन्द लम्साल, माया श्रेष्ठ र गीता गुरुङलाई मन्त्री पदमा नियुक्ति दिएका छन्।

लामाले राजीनामा दिएसँगै कांग्रेस संसदीय दलका नव निर्वाचित नेता इन्द्रबहादुर बानियाँ मुख्यमन्त्री बन्ने प्रक्रिया अघि बढ्नेछ। उनी बागमती प्रदेशका छैटौँ मुख्यमन्त्री हुनेछन्।