काङ्ग्रेस बागमती प्रदेश संसदीय दलको नेतामा बानियाँ विजयी

काठमाडौं । नेपाली कांग्रेस बागमती प्रदेश संसदीय दलको नेतामा इन्द्रबहादुर बानियाँ निर्वाचित भएका छन्। मुख्यमन्त्री बहादुरसिं लामालाई हराउँदै बानियाँ नेता निर्वाचित भएका हुन् ।

बानियाँले २२ मत र लामाले १४ मत प्राप्त गरेको निर्वाचन समितिका संयोजक हरिशरण श्रेष्ठले बताए । एक मत बदर भएको छ । गत साउन ९ गते लामाविरुद्ध संसदीय दलमा २१ जना प्रदेश संसदहरूले अविश्वासको प्रस्ताव दर्ता गराएका थिए ।

त्यसकै प्रक्रिया स्वरूप मंगलबार कांग्रेस संसदीय दलको कार्यालयमा भएको मत विभाजनमा लामाको पक्षमा १५ मत मात्रै परेको थियो । विपक्षमा २२ मत परेसँगै लामाले संसदीय दलको नेताको हैसियत गुमाएपछि नयाँ नेता चयनको लागि निर्वाचन भएको हो ।

नेपाली काङ्ग्रेस बागमती प्रदेश सभापति बानियाँ दल नेता निर्वाचित भएपछि मुख्यमन्त्री लामालाई नैतिक संकट परेको छ । यद्यपि आजै तीन जना नयाँ मन्त्री नियुक्त गरेका लामाले सहजै मुख्यमन्त्री नछाड्ने स्पष्ट पारेको छ ।