कविलासी नगरपालिकामा नियुक्ति विवाद : छोरालाई जागिर, अरूलाई घुस फिर्ता ?

सर्लाही । कविलासी नगरपालिकाका नगरप्रमुख ब्रह्म देव रायले आफ्नै छोरालाई नगरपालिकामै रोजगार संयोजक पदमा नियुक्त गरेपछि स्थानीयस्तरमा विवाद चर्किएको छ।

स्थानीयहरूले यो नियुक्तिलाई नातावाद र कानुनी प्रक्रियाको उल्लङ्घन भएको भन्दै आपत्ति जनाएका छन्।

उनीहरूले नगरप्रमुखले खुला प्रतिस्पर्धाको प्रक्रिया बेपत्ता पारेर आफ्नै छोरालाई जागिर दिएको आरोप लगाएका छन्। नगरपालिकाले भने नियुक्ति प्रक्रिया सम्बन्धी कुनै जानकारी सार्वजनिक गरेको छैन।

तर, स्थानीयहरूमध्ये केहीले पदका लागि आवेदन दिएका उम्मेदवारहरूसँग लाखौँ रुपैयाँको कमिशन असुलिएको, अनि जागिर नपाएका केहीलाई पैसा फिर्ता गरिएको दाबी गरेका छन्।

‘फारम खुला गरियो, अन्तर्वार्ता पनि भयो, तर नियुक्ति अन्ततः आफ्नै छोरालाई गरियो,’ एक असफल उम्मेदवारले भने, ‘यो न्यायसंगत प्रक्रिया होइन।’

स्थानीय सामाजिक अभियन्ता र युवाहरूले यस घटनाबारे स्वतन्त्र छानबिन गर्न माग गरेका छन्।

उनीहरू भन्छन्, “नगरपालिकामा राजनीतिक पहुँचका आधारमा हुने नियुक्ति बन्द हुनुपर्छ। योग्यलाई मौका मिल्नुपर्छ।”

यो विषयमा नगरप्रमुख रायले भने मिडियासँग औपचारिक प्रतिक्रिया दिन मानेका छैनन्।