पार्टीलाई बन्धक बनाउन पाइँदैन, घुस प्रकरणबारे जवाफ दिनुपर्छ: रेशम चौधरी

काठमाडौँ । नागरिक उन्मुक्ति पार्टीका संरक्षक रेशमलाल चौधरीले पार्टी अध्यक्ष रञ्जिता श्रेष्ठले आफूमाथि लागेको मुद्दा या आरोपबारे जवाफ दिनुपर्ने बताएका छन् । साथै उनले महासचिवले बोलाएको बैठकबारे आफूले नबोलाएको भनेर अध्यक्षले भन्न नमिल्ने प्रस्ट पारेका छन् ।

संसदीय दलका नेतासमेत रहेका गङ्गाराम चौधरीले साउन ९ र १० गते केन्द्रीय समिति बैठक बोलाएका थिए । तर उक्त बैठकलाई रञ्जिताले आधिकारिक नभएको बताएकी थिइन् ।

बिहीबार साँझ भिडियो सन्देश जारी गर्दै चौधरीले आफूले नै नागरिक उन्मुक्ति पार्टी गठन गरेको तर यसलाई पटक पटक काटेर ठुटो बनाउने प्रयास गरेकोमा गुनासो गरेका छन् ।

उनले आफूलाई पार्टीको संरक्षकमा ल्याएर थन्क्याइएको र भूमिकाविहीन जस्तै बनाएर आफूमाथिमात्र एकोहोरो प्रहार भइरहेको गुनासो गरेका छन् ।

उनले अध्यक्ष श्रेष्ठले मैले बैठक बोलाएको होइन भनेर पन्छिन नपाउने पनि बताएका छन् । ‘प्रतिशोधको भावना राख्नु गलत हो । आउनुपर्छ जवाफ दिनुपर्छ । मुद्दा लाग्यो खै जवाफ ? खै भन्नुभएको ?, पार्टीलाई बन्धक वा निरङ्कुश बनाउन पाइँदैन, निकास तपाईँले नै दिनुपर्छ’, चौधरीको भनाइ छ ।