थाइल्याण्ड र कम्बोडियाका सेनाबीच गोली हानाहान

काठमाडौं । थाइल्याण्ड र कम्बोडियाबीच सीमा क्षेत्रमा तनाव सिर्जना भएको छ । सीमा क्षेत्रमा बिहीबार बिहान दुई देशका सेनाबीच गोली हानाहान भएपछि दुवै देशले एकअर्कामाथि हवाई आक्रमण थालेको अन्तर्राष्ट्रिय समाचार एजेन्सीहरुले उल्लेख गरेका छन् ।

दुवै देशले एकले अर्कोलाई हमलाको सुरूवात गरेको आरोप लगाएको छ । बीबीसीका अनुसार सीमा क्षेत्रमा तनावपछि कम्बोडियाले थाइल्याण्डमा र्दुइटा रकेटले हमला गरेको छ । त्यसपछि थाइल्याण्डले एफ–१६ लडाकू विमानले कम्बोडियाको सैन्य अड्डामा बम खसालेको समाचारमा जनाइएको छ ।

रकेट हमलाबाट थाइल्याण्डमा कम्तिमा दुई जना मानिसहरूको मृत्यु भएको भनिएको छ । तनावपछि सुरिन प्रान्तको काब चोइङ गाउँमा ३० देखि ४० हजार मानिसलाई सुरक्षित ठाउँमा सारिएको छ ।

त्यस्तै थाइल्याण्डले सीमाक्षेत्रमा विद्यालय बन्द गरेको छ । थाइल्याण्डले कम्बोडियासँगको सबै सिमाना बन्द गरेको छ । दुवै देशले एक अर्कासँगको कुटनीतिक सम्बन्ध घटाएको बताइएको छ ।

तनावपछि थाइल्याण्डले कम्बोडियाको सैन्य अखडाहरूमा लक्ष्य गरेर हमला गरिरहेको अन्तर्राष्ट्रिय सञ्चारमाध्यमहरूले जनाएका छन् । सैन्य क्षमताका आधारमा थाइल्याण्ड कम्बोडियाभन्दा तीनगुणा शक्तिशाली रहेको अमेरिकी मिडिया सिएनएनले जनाएको छ ।