कालीमाटीमा रायो सागमा भेटियो अत्यधिक विषादी

काठमाडौं । कालीमाटी फलफूल तथा तरकारी बजारमा भित्रिएको सागमा अत्यधिक विषादी भेटिएको छ ।

विषादी अवशेष द्रुत विश्लेषण प्रयोगशाला एकाइले बुधबार गरेको परीक्षणका क्रममा बेच्न राखिएको सागमा खानै नमिल्ने स्तरको विषादी भेटिएको हो ।

दोलखाबाट बिक्रीका लागि कालीमाटी बजारमा बुधबार ल्याइएको रायो सागमा ८०। ९५ प्रतिशत ‘अर्गानोफस्फेट’ नामक विषादी भेटिएको कालीमाटी फलफूल तथा तरकारी बजार विकास समितिले जनाएको छ ।

प्रयोगशालाका अनुसार ३५ प्रतिशतभन्दा कम कीटनाशक विषादी देखिएमा उपयोगयोग्य मानिन्छ । यस्तै, ३५ देखि ४५ प्रतिशतसम्म देखिए केहीदिन राखेर उपभोग गर्न मिल्छ । तर, ४५ प्रतिशतभन्दा बढी कीटनाशक विषादी देखिए उपभोगका लागि अयोग्य अर्थात बिसर्जन गर्नुपर्छ ।