सार्वजनिक अडियोमा संलग्नता भेटिए जस्तोसुकै सजाय भोग्य तयार छु: मन्त्री अधिकारी

काठमाडौं । भूमि व्यवस्था, सहकारी तथा गरिबी निवारण मन्त्री बलराम अधिकारीले आफूबारे नियोजित रूपमा हल्ला फैलिएको उल्लेख गर्दै कुनै संलग्नता फेला परे जस्तोसुकै सजाय पनि भोग्न तयार भएको बताएका छन् ।

मन्त्रालयको एक वर्षे उपलब्धी सार्वजनिक गर्न आज (बिहीबार) आयोजित पत्रकार सम्मेलनमा मन्त्री अधिकारीले भने- ‘यहाँहरूले अडियो सुन्नुभएको छ । मेरो आवाज, मैले त्यहाँ मागेको कुरा, मैले यो गर्दिन्छु भन्ने तपाईंहरूले फेला पार्नुभयो भने जस्तोसुकै सजाय पनि भोग्न तयार छु।’

मन्त्री अधिकारीले अडियो प्रकरणलाई आफ्नो चरित्र हत्याको प्रयास भएको रूपमा बुझेका छन्।n‘कुनै आफ्नो योजना पूरा गर्न खोजेका व्यक्तिले आफ्नो अभिष्ट पूरा गर्न मालपोत अधिकृतलाई फिर्ता गराउन आएका थिए । मैले हुन्नँ भनेँ । त्यसपछि यी कुराहरू बाहिर आए,’ उनले भने।

उनले मालपोत अधिकृत पनि फेरि सरुवा भएर जान नखोजेको बताए। ‘मालपोत अधिकृत सरुवा भएर गएपछि त्यहाँ जाने कुरा पनि भएको छैन । मालपोत अधिकृतले जान्छु भन्नुभएको पनि छैन,’ उनले भने, ‘अहिले आएर जोडेर अब मेरो नामसँग मुछेर, मेरो परिवारसँग मुछेर हाम्रो चरित्र हत्या गर्ने र आफ्नो अभिष्ट पूरा गर्ने अभ्यास गरिएको छ ।’

उनले एक वर्षको अवधिमा नीतिगत सुधार, संस्थागत विकास र सेवा प्रवाहमा सुधार गरेको दाबी पनि गरे।

भूमिहीन दलित, सुकुम्बासी र अव्यवस्थित बसोबासीको व्यवस्थापनका लागि भूमि समस्या समाधान आयोग गठन आदेश, २०८१ स्वीकृत भई आयोगले देशभर कार्य सञ्चालन गरिरहेको पनि उनले बताए। यसका साथै लगत संकलन र जग्गा उपलब्ध गराउनेसम्बन्धी कार्यविधिहरू तयार गरी स्थानीय तहहरूबाट विवरण संकलन र नापनक्साको काम तीव्र पारिएको बताए।

सहकारी क्षेत्रमा देखिएको तरलता समस्या समाधानका लागि बचत तथा ऋण सहकारी संस्था सम्बन्धी स्थिरीकरण कोष स्थापना तथा सञ्चालन कार्यविधि, २०७६ संशोधन गरी कार्यान्वयनमा उनको भनाइ छ।