सुनसरीमा मध्यराति भिनाजुले गोली हानेर सालीको हत्या

काठमाडौं । सुनसरीमा भिनाजुले गोली हानेर सालीको हत्या गरेका छन्। हरिनगर गाउँपालिका–६ घर भएकी १७ वर्षीया अर्जना खातनुको गएराति आफ्नै भिनाजुले गोली हानी हत्या गरेका प्रहरीले जनाएको छ।

भारतको अररिया घर भएका आजात मियाँले साली अर्चनाको गोली हानी हत्या गरेका सुनसरीका प्रहरी उपरीक्षक सुमन तिम्सिनाले बताए।

घरमा मृतक खातुन र उनकी बहिनी मात्रै बस्दै आएका थिए। भारतको अररीया जिल्ला घर भएका भिनाजु रातिराति मात्रै सालीहरु भएको ठाउँमा आउने गरेको र हिजो पनि राति आएर उनले सालीलाई गोली प्रहार गरेको प्रहरीले जनाएको छ।

१७ वर्षीया अर्चना खातुनलाई पछाडिबाट गोली हान्दा घटनास्थलमै मृत्यु भएको प्रारम्भिक अनुसन्धानबाट खुलेको एसपी तिम्सिनाले बताए।

घटनापछि शव पोस्टमार्टमका लागि बीपी कोइराला स्वास्थ्य विज्ञान प्रतिष्ठान, धरानमा पठाइएको छ। प्रहरीले घटनास्थलको मुचुल्का उठाएर थप अनुसन्धान गरिरहेको जनाएको छ। घटना अनुसन्धानको लागि जिल्ला प्रहरी कार्यालयबाट डीएसपीको नेतृत्वमा प्रहरी टोली खटिएको छ।

हत्यामा संलग्न मियाँ फरार छन्। प्रहरीले उनको खोजी पनि गरिरहेको छ।