नेप्से परिसूचक ९.१४ अङ्कले बढ्यो

काठमाडौं । साताको अन्तिम कारोबार दिन नेप्से परिसूचक बढेर बन्द भएको छ । नेप्से बढेर २७०० विन्दुभन्दा माथि बन्द भएको छ । नेप्से परिसूचक साढे २ महिनापछि २७०० विन्दुमाथि बन्द भएको हो । यस अघि गत वैशाख ७ गते नेप्से २७०० विन्दुमाथि बन्द भएको थियो ।

बिहीबार नेप्से परिसूचक ९.१४ अङ्क बढेर २७०३.९६ विन्दुमा पुगेको छ । त्यस्तै, सेन्सेटिभ इण्डेक्स २.१९ अङ्क बढेको छ भने फ्लोट इण्डेक्स १.०२ अङ्क र सेन्सेटिभ फ्लोट इण्डेक्स ०.८५ अङ्क बढेको छ ।

नेप्से बढेपनि कारोबार रकम भने सामान्य घटेको छ । बुधवार ९ अर्ब ७४ करोडको सेयर खरिदबिक्री भएको बजारमा आज ३११ स्टकको ९६ हजार ४११ पटकको कारोबारमा ९ अर्ब ६४ करोड ५५ लाख ५० हजार रुपैयाँबराबरको २ करोड ४९ लाख ७६ हजार कित्ता सेयर खरिदबिक्री भएको छ ।