कुलिङ पिरियडमा बदमासीबारे छानबिन गर्न संसदीय समिति बनाउन कांग्रेसको माग

काठमाडौं । नेपाली कांग्रेसका सांसदले कुलिङ अफ पिरियडको व्यवस्थासम्बन्धमा भएको बदमासीबारे छानबिन गर्न संसदीय समितिको माग गरेका छन् ।

प्रतिनिधिसभाअन्तर्गतको राज्यव्यवस्था तथा सुशासन समितिको आजको बैठकमा कांग्रेस सांसद हृदयराम थानीले उच्चस्तरीय संसदीय समिति बनाएर छानबिन गर्न माग गरेका हुन् । एक जना व्यक्तिले मात्रै चाहेर यति ठूलो चलखेल हुन नसक्ने भन्दै उनले यसको पछाडि ठूलै समूह रहेको आशंका व्यक्त गरे ।

‘निजामती सेवा विधेयकमा भएको छेडखानीका विषयमा निष्पक्ष छानबिनका लागि उच्चस्तरीय संसदीय समिति बनाइनु पर्दछ,’ बैठकमा सांसद थानीले भने ।

समितिबाट षड्यन्त्र भएको सुन्दा दुस्ख लागेको भन्दै उनले समितिका सभापति र सचिवले यो विषयमा जानकारी छैन भनेर उम्किन नमिल्ने बताए ।