नाबालिग बलात्कारको आरोपमा पक्राउ परेका वाईसीएल नेता निलम्बित

काठमाडौं । नेकपा माओवादी केन्द्रको युवा संगठन योङ कम्युनिस्ट लिग (वाईसीएल)ले कर्णाली प्रदेश समिति सदस्य रमेश केसीलाई निलम्बन गरेको छ ।

वाईसीएल कर्णाली प्रदेश समितिका अध्यक्ष लक्ष्मण वली र सचिव लोकेन्द्र रानाले विज्ञप्ति जारी गर्दै नाबालिक किशोरीलाई बलात्कार गरेको आरोप लागेपछि केसीलाई संगठनबाट निलम्बन गरिएको जानकारी दिएका हुन् ।

रुकुमपश्चिमको चौरजहारी नगरपालिका–४ का ३० वर्षीय केसीलाई प्रहरीले जाजरकोटकी नाबालिग किशोरीलाई बलात्कार गरेको आरोपमा गएको बिहीबार नै पक्राउ गरेको थियो । केसी वाईसीएलको चौरजहारी नगर कमिटीका इन्चार्जसमेत हुन् ।

केसीको बलात्कारमा परेकी १७ वर्षीया किशोरीबाट एक वर्षअघि नै शिशुको जन्मसमेत भइसकेको खुलेको छ । केसीले आफूलाई २०७९ सालमा बलात्कार गरेको आरोप किशोरीको छ ।

१७ वर्षको उमेरमा केसीले आफूलाई २०७९ चैतमा चौरजहारीको एक होटेलमा लगेर बलात्कार गरेको आरोप उनले लगाएकी छन् । पीडित किशोरीका अनुसार बलात्कारपछि छोरीको समेत जन्म भएको छ । छोरीको जन्म भएपछि केसीले ‘सबै खर्च व्यवस्थापन गर्छु, मुद्दा मामिला नगर’ भन्दै रोक्दै आएका थिए ।

तर, पछिल्लो समय उनले बेवास्ता गर्न थालेपछि एक महिनाअघि किशोरीले जिल्ला प्रहरी कार्यालयमा दिएको उजुरीका आधारमा उनलाई पक्राउ गरिएको प्रहरीले जनाएको छ ।