सुरक्षा गतिविधिको लाइभ नगर्न भारतीय रक्षा मन्त्रालयको कडा निर्देशन

काठमाडौं । भारतको रक्षा मन्त्रालयले सबै सञ्चार माध्यम, डिजिटल प्लेटफर्म तथा व्यक्तिहरूलाई सुरक्षा गतिविधिको प्रत्यक्ष प्रसारण (लाइभ कभरेज) नगर्न कडा निर्देशन जारी गरेको छ । भारत-पाकिस्तानबीच चुलिँदो तनावको सन्दर्भमा मन्त्रालयले यस्तो निर्देशन दिएको हो ।

मन्त्रालयले संवेदनशील तथा स्रोतमा आधारित जानकारी समयअघि सार्वजनिक हुँदा सैन्य अभियानमा असर पर्ने र नागरिकको सुरक्षामा समेत जोखिम उत्पन्न हुने जनाएको छ ।

यससँगै मन्त्रालयले कारगिल युद्ध, २६ सेप्टेम्बरको मुम्बई हमला र कन्दार विमान अपहरणजस्ता घटनाहरूको सन्दर्भ उल्लेख गर्दै, यस्ता सङ्कटको समयमा अनियन्त्रित रिपोर्टिङले गम्भीर सुरक्षा चुनौती निम्त्याएको उदाहरणका रूपमा प्रस्तुत गरेको छ ।

रक्षा मन्त्रालयले केबल टेलिभिजन नेटवर्क ९रेगुलेसन० ऐनको स्मरण गराउँदै आतंकवादविरोधी अभियानको क्रममा केवल आधिकारिक स्रोतबाट प्राप्त जानकारी मात्र प्रकाशन वा प्रसारण गर्न मिल्ने स्पष्ट पारेको छ ।

मन्त्रालयले भनेको छ, ‘सबै सरोकारवालासँग आग्रह छ कि राष्ट्रको सुरक्षाका लागि उच्चतम पत्रकारिता मानक अपनाउँदै संवेदनशीलता, सतर्कता र जिम्मेवारीका साथ समाचार सम्प्रेषण गर्न सहयोग गरियोस् ।’

अन्त्यमा मन्त्रालयले सबै सञ्चार माध्यम र व्यक्तिलाई आधिकारिक सूचना सार्वजनिक नभएसम्म सुरक्षा कारबाहीसम्बन्धी विवरण गोप्य राख्न आग्रह गर्दै, राष्ट्रिय सुरक्षामा सघाउन अपिल गरेको छ ।