वडाध्यक्षले मादक पदार्थ सेवन गरेर कर्मचारीमाथि हातपात गरेपछि कामकाज ठप्प

काठमाडौँ । मादक पदार्थ सेवन गरेर वडाध्यक्षले प्रशासन शाखा प्रमुखमाथि हातपात गरेपछि पोखरा महानगरपालिकाका कर्मचारीले सेवा ठप्प पारेका छन् ।

वडा नम्बर ४ का अध्यक्ष देवकृष्ण पराजुलीले मंगललवार प्रमुख प्रशासकीय अधिकृतको कार्यकक्षमा प्रशासन महाशाखा प्रमुख ईश्वरीप्रसाद पोख्रेललाई हातपात गरेका हुन् ।

महानगरपालिकाका कर्मचारीलाई तालिममा पठाउँदा सल्लाह नगरेको भन्दै आफूमाथि हातपात गरेको प्रशासन शाखा प्रमुख पोख्रेलले बताएका छन् ।

प्रशासकीय अधिकृतको कार्यकक्षमा पुग्दा साथ वडाध्यक्षले अपशब्द बोल्दै हातपात गरेको उनको आरोप छ । वडाध्यक्षले उक्त समयमा मादक पदार्थसमेत सेवन गरेको पोख्रेलको दाबी छ ।

यता महानगरपालिकाका प्रवक्ता मोतीलाल तिम्सिनाले हातपात भएको घटनाबारे छलफल भइरहेको बताएका छन् । तिम्सिनाले आज कर्मचारीले कामकाज ठप्प परेको र बैठक बसेर समस्या समाधान निकालिने बताए ।

उनले भने, ‘अहिले पछि हामी छलफलमै छौ, कर्मचारीहरूले कामकाज रोकेका छन्, के विषयमा किन र के कारणले विवाद सिर्जना भयो भन्नेबारे भोली बिहानसम्म मेयर सापको नेतृत्वमा बैठक बसेर समाधान निकाल्छौँ ।’