परराष्ट्रमन्त्रीले भने – कोरोना विरुद्धको खोपमा भारतको प्राथमिकतामा नेपाल

काठमाडौं । परराष्ट्रमन्त्री प्रदीपकुमार ज्ञवालीले भारतले कोरोनाविरुद्धको खोपमा नेपाललाई पनि प्राथमिकतामा राखेको बताएका छन् ।

अपरान्ह स्वदेश फर्किएका मन्त्री ज्ञवालीले त्रिभूवन अन्तर्राष्ट्रिय विमानस्थलमा आयोजित पत्रकार सम्मेलनमा भारतले कोरोनाविरुद्धको खोप नेपाललाई पनि वितरण गर्ने गरी प्राथमिकतामा राखेको बताए।

भारतका विदेशमन्त्री एस जयशंकरसँग भएको वार्ताका क्रममा नेपालमा कोभिड भ्याक्सिनको तत्कालको आवश्यकता भारतले पूर्ति गरिदिने सहमति भएको पनि ज्ञवालीले बताए । मन्त्री ज्ञवालीले कोरोनाका कारण बन्द हवाइ तथा स्थलमार्ग क्रमशः खोल्दै जाने सहमति भएको समेत बताए ।

मन्त्री ज्ञवाली नेपाल–भारत संयुक्त आयोगको बैठकका लागि बिहीबार दिल्ली गएका थिए। बैठकमा ज्ञवालीले नेपाल भारत सम्बन्धका आर्थिक, राजनीतिक सांस्कृतिक लगायतका पक्षमा छलफल गरेका थिए ।