पाथीभरा जाँदै गरेको जिपमा करेन्ट लाग्दा ४ जनाको मृत्यु, घाइतेलाई हेलिकप्टरमार्फत काठमाडौं ल्याइदै

ताप्लेजुङ । ताप्लेजुङको फुङलिङ नगरपालिका १० स्थित काफ्लेपाटी सडकखण्डमा सोमबार बिहान पाथीभरा दर्शनका लागि जाँदै गरेको बोलेरो जिपमा करेन्ट लागेर आगलागी हुँदा ४ जनाको ज्यान गएको छ ।

ताप्लेजुङबाट पाथिभरा मन्दिर जानेक्रममा फुङलिङ नगरपालिका १० गुन्द्रे र तेर्सेको छेउमा सडकमा बिजुलीको तार लत्रिएर मे १ ज ३०११ गाडीमा आगो लाग्दा ४ जनाको मृत्यु भएको जिल्ला प्रहरी कार्यालय ताप्लेजुङका सुचना अधिकारी एवं प्रहरी निरीक्षक विवेक बस्नेतले जानकारी दिए ।

उनका अनुसार मृत्यु हुनेमा फुङलिङ नगरपालिका १० का सवारी चालक वर्ष ४२ का दुर्गा भट्टराई, ललितपुर जिल्लाकी वर्ष १६ की आध्या आचार्य, झापा जिल्लाका वर्ष ६९ की सरिता पौडेल, उनका श्रीमान् झापाकै वर्ष ७० का विनोद पौडेल रहेका छन् ।

गाडीमा ६ जना रहेका थिए । अन्य ललितपुरकी वर्ष ४५ की सविना आचार्य र उनका छोरा अभियम आचार्य घाइते भएका छन् । उनीहरुलाई उपचारका लागि जिल्ला अस्पताल लगिएको प्रहरीले जनाएको छ ।

घाईते सविनाको अवस्था गम्भिर रहेको र उनका छोरा घाईते अभियमको अवस्था मध्यम रहेको प्रहरीले जनाएको छ । मृतक आध्या घाईते सविनाको छोरी र सरिता र विनोद पौडेल सविनाको बुबा आमा रहेको जनाइएको छ ।

घाईते सबिना आचार्य र उनका १० वर्षीय छोरा भबिमयलाई काठमाडौं ल्याउन लागिएको बताइएको छ । जिल्लामा प्रारम्भिक उपचारपछि थप उपचारका लागि हेलिकप्टरमार्फत् काठमाडौं ल्याउन लागिएको हो । त्यसका लागि काठमाडौंबाट हेलिकप्टर ताप्लेजुङका लागि प्रस्थान गरिसकेको कोशी प्रदेश प्रहरी कार्यालयका प्रवक्ता एसएसपी भीमबहादुर दाहालले जानकारी दिए । प्रहरीका अनुसार सबिना र उनका छोरा खतरामुक्त छन् ।

पाथीभरा दर्शनका लागि आइतबार ताप्लेजुङ सदरमुकाम फुङलिङ आईपुगेका उनीहरु होटेल प्यारिजमा बसेर सोमबार बिहान ३ः३० बजे पाथीभरा दर्शनका लागि निस्केका थिए ।