सांसद धवलशमशेर पक्राउबारे सभामुखले गराए सदनलाई जानकारी

काठमाडौं । सभामुख देवराज घिमिरेले राप्रपाका सांसद धवल शम्शेर राणा पक्राउ परेकोबारे संसदलाई जानकारी गराएका छन् ।

राजावादीको प्रदर्शनमा भएको हिंसात्मक गतिविधि गराउन भूमिका खेलेको आरोपमा राणा पक्राउ परेको सूचना संसद सचिवालयलाई आएको भन्दै सभामुखले प्रतिनिधिसभा नियमावली अनुसार सदनलाई जानकारी गराएका हुन् ।

संविधानको धारा १०३ को उपधारा ३ मा सांसद पक्राउको सूचना सभामुखलाई दिनुपर्ने व्यवस्था छ । सोही व्यवस्थाअनुसार काठमाडौं प्रहरी परिसरले शनिबार सांसद पक्राउ गरेको सूचना सभामुख र संसद सचिवालयलाई दिएको थियो ।

शुक्रबार तीनकुनेमा राजावादीहरूले गरेको प्रदर्शनका क्रममा दुई जनाको मृत्यु भएको थियो भने करोडौँको निजी तथा सरकारी सम्पत्तिमाथि तोडफोड तथा आगजनी गरिएको थियो ।

सांसद राणाले सो प्रदर्शनलाई हिंसात्मक बनाउन भूमिका खेलेकाले प्रहरीले मतियारका रूपमा पक्राउ गरेको हो । राणालाई प्रहरीले फौजदारी कसुरमा अनुसन्धान अघि बढाएको छ ।