एसइई परीक्षामा चिटको फोटोकपी वितरण गर्ने दुई जना पक्राउ

दैलेख । जिल्ला प्रहरी कार्यालय दैलेखले एसइई परीक्षामा चिटको फोटोकपी गरेर वितरण गरिरहेका दुई व्यक्तिलाई पक्राउ गरेको छ । प्रहरीले उनीहरूबाट प्रयोग भएको फोटोकपी मेसिन पनि नियन्त्रणमा लिएको छ ।

आज देशभर एसइई अन्तर्गत गणित विषयको परीक्षा सञ्चालन भइरहेको छ । यसै क्रममा दैलेख सदरमुकामस्थित त्रिभुवन माध्यमिक विद्यालयमा केही स्थानीयले फोटोकपी मेसिन प्रयोग गरी परीक्षार्थीलाई चिट वितरण गरिरहेको पाइएको प्रहरीले जनाएको छ ।

जिल्ला प्रहरी कार्यालय दैलेखका प्रहरी प्रमुख डीएसपी सुनिल दाहालका अनुसार परीक्षा हलबाटै प्रश्न पत्र बाहिरिएको थियो, जसपछि प्रहरी अनुसन्धान अघि बढाइएको हो । पक्राउ परेका व्यक्तिहरूमाथि कानुनी कारबाही प्रक्रिया अघि बढाइएको छ ।

प्रहरीका अनुसार परीक्षालाई सुरक्षित र मर्यादित बनाउन परीक्षा केन्द्रहरूको निगरानीलाई थप कडा पारिएको छ । चिट तथा अनियमितता नियन्त्रण गर्न प्रहरीसँग समन्वय गरेर अघि बढी रहेको विद्यालय प्रशासनले जनाएको छ ।