‘नो केवलकार’ आन्दोलनमा लागेका संघसंस्थालाई गृहमन्त्रालयले पुनः वार्तामा बोलायो

काठमाडौं । पाथीभरा क्षेत्रमा ‘नो केवलकार’ आन्दोलनमा लागेका संघ संस्थाहरुलाई गृहमन्त्रालयले पुनः वार्तामा बोलाएको छ । गृहमन्त्रालयले गठन गरेको वार्ता समितिका संयोजक प्रेमप्रसाद भट्टराईले शुक्रबार आन्दोलनरत पक्षलाई वार्तामा बोलाएका हुन् ।

संयोजक भट्टराईले मुक्कुम्लुङ ताङ्सेःपचुम्भो र मुक्कुम्लुङ अन्तरदलीय संघर्ष समिति, ताप्लेजुङलाई वार्तामा आमन्त्रण गरेका छन् ।

संयोजक भट्टराईको बिज्ञप्तिमा उल्लेख छ–‘ताप्लेजुङ जिल्लाको पाथिभरा क्षेत्रमा केबलकार निर्माणको क्रममा उत्पन्न समस्या र विवादलाई वार्ता र संवादको माध्यमबाट समस्याको शान्तिपूर्ण समाधानका लागि सम्वन्धित सरोकारवाला आयोजना निर्माण पक्षसँग समेत समन्वय गरी आन्दोलनरत पक्षसँग वार्ता गर्न गृह मन्त्रालयद्वारा गठित वार्ताटोली र आन्दोलनरत वार्ता सहजीकरण समितिबीच मिति २०८१ माघ २२ गतेदेखि निरन्तर रुपमा वार्ता एवं संवाद भई रहेको व्यहोरा सबैमा विदितै छ ।

यसै सन्दर्भमा आन्दोलनरत पक्षबाट उठाइएका सामाजिक, धार्मिक, सांस्कृतिक तथा स्थानीय समुदायका स्थानीय मागहरुका सम्बन्धमा स्थानीय सरोकारवालासँग वार्ता र संवादको माध्यमबाट समस्याको शान्तिपूर्ण समाधान गर्ने विषयमा वार्ताका लागि ताप्लेजुङ जिल्लाका स्थानीय प्रतिनिधिहरुलाई आमन्त्रण गर्दछु ।’

गृहमन्त्रालयको बिज्ञप्ति