ब्राउन सुगर र गाँजासहित सशस्त्र प्रहरीद्वारा ६ जना पक्राउ

काठमाडौं । सशस्त्र प्रहरीले करीव ३४ ग्राम ब्राउन सुगरसहित काठमाडौं महानगरपालिका–१४ कलंकीस्थित पेट्रोल पम्प नजिकैबाट चार जनालाई नियन्त्रणमा लिएको छ ।

मंगलबार नियन्त्रणमा लिइएकाहरुमा धादिङ जिल्लाको गल्छी गाउँपालिका–८ बस्ने २२ बर्षीय, सोही जिल्लाको निलकण्ठ गाउँपालिका–११ बस्ने २७ बर्षीय, नुवाकोट जिल्लाको लिखु गाउँपालिका–३ बस्ने २७ बर्षीय र काठमाडौं महानगरपालिका–१४ कलंकी बस्ने ३७ बर्षीय गरी ४ पुरुष रहेका छन् ।

एपीएफ इन्टेलीजेन्स व्यूरोको विशेष सूचनाको आधारमा खटिएको सुरक्षा फौजले उनीहरुले ब्राउन सुगर बेचविखन गरिरहेको अवस्थामा नियन्त्रणमा लिएको हो । साथै उनीहरुले प्रयोग गरेको प्रदेश ०२५ प ८४५९ मोटरसाइकल र बा १५ च १७७३ नम्बरको होण्डाको क्रेटा गाडीसमेत नियन्त्रणमा लिएको छ ।

त्यसैगरी त्रिभुवन अन्तर्राष्ट्रिय विमानस्थलबाट फागुन २० गते सशस्त्र प्रहरीले २२ केजी गाँजासहित दुई जना भारतीय नागरिकलाई नियन्त्रणमा लिएको छ ।

थाई एयरवेजको उडान नं. टीजी ३१९ बाट नेपाल आएका ४० बर्षीय पुरुष र ३७ बर्षीय महिलाले लगेजभित्र चक्लेटको प्याकेट बनाई लिएर आएको २२ के.जी. गाँजासहित उनीहरुलाई त्रिभुवन अन्तर्राष्ट्रिय विमानस्थल भन्सार सुरक्षा बेशले पुन जाँच गर्ने क्रममा गाँजासहित नियन्त्रणमा लिएको हो ।

नियन्त्रणमा लिइएकाहरुलाई आवश्यक अनुसन्धान तथा कारबाहीका लागि सम्बन्धित नियकायमा बुझाइएको छ ।