विद्रोहको अधिकार कसैले रोक्न नसक्ने झलनाथको चेतावनी

काठमाडौँ – नेकपा एकीकृत समाजवादीका सम्मानित नेता झलनाथ खनालले पार्टी निकट विद्यार्थी संगठन अनेरास्ववियूको विवाद समाधान नभए अलग ढंगले अघि बढ्न सकिने बताएका छन् ।

अनेरास्ववियू असन्तुष्ट पक्षले सोमबार काठमाडौँमा आयोजना गरेको भेलामा खनालले अनेरास्ववियूको विवाद समाधानका लागि पार्टीको बैठकमा छलफल गर्ने भन्दै निष्कर्ष निस्कन नसके अलग ढंगले अघि बढ्न सकिने बताएका हुन् ।

असन्तुष्ट पक्षले ब्यानर राखेर भेला आयोजना गरेपछि खनालले तत्कालका लागि ब्यानर हटाउन आग्रह गरेका थिए ।

खनालले अहिले छुट्टै भेला नभई छलफल कार्यक्रम मात्र गर्न सुझाव दिएका थिए । उनले जहाँ जहाँबाट आग्रह पूर्वाग्रह सुरु भएका छन्, त्यसलाई मिलाउने कोसिस गर्ने र मिल्न नसके अलग ढंगले विभिन्न सोचका साथ जान सकिने उल्लेख गरे ।

उनले पार्टीले गलत ढंगले निर्णय गरेर पेल्न खोजे आफू संरक्षकको भूमिकामा रहने आश्वासन असन्तुष्ट पक्षलाई दिए । अहिलेका लागि एकता कायम गर्न हर सम्भव प्रयास गर्ने उनको भनाइ छ । उनले केन्द्रीय कमिटी बैठकसम्म पर्खन आग्रह गर्दै तत्काल समानान्तर कमिटी गठन नगर्न सुझाव दिए ।