भारतमा नेपाली विद्यार्थीको रहस्यमय मृत्यु, घटनाको अनुसन्धानका लागि कूटनीतिक पहल गर्न आग्रह

काठमाडौँ – भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजीमा अध्ययनरत नेपाली विद्यार्थीको रहस्यमय मृत्यु भएको छ । रुपन्देहीको बुटवल निवासी विद्यार्थी प्रकृति लम्सालको रहस्यमय निधन भएको हो ।

उक्त घटनाप्रति राप्रपा लुम्बिनी प्रदेशले गम्भीर ध्यानाकर्षण भएको जनाएको छ । लुम्बिनी प्रदेश अध्यक्ष प्रदीपकुमार उदयले जारी गरेको विज्ञप्तिमा भनिएको छ, ‘सो रहस्यमय निधनबारे गम्भीरतापूर्वक अनुसन्धान गर्न र सत्य तथ्य पत्ता लगाउन नेपाल सरकारले तत्काल भारत सरकारसँग कूटनैतिक पहल गर्न राप्रपा लुम्बिनी प्रदेश नेपाल सरकारसँग जोडदार माग गर्दछ ।’

उनले विद्यार्थीहरूद्वारा गरिएको प्रदर्शन दबाउन त्यहाँ अध्ययनरत नेपाली बिद्यार्थीहरु माथि गरिएको दमनप्रति चासो लिन समेत नेपाल सरकारसँग आग्रह गरेका छन् ।

कलेज प्रशासनले प्रकृतिले आत्महत्या गरेको दाबी गरे पनि त्यहाँ अध्ययनरत नेपाली विद्यार्थीहरूले भने उनको मृत्यु शंकास्पद रहेको भन्दै अनुसन्धान गर्न माग गरेका छन्।

आन्दोलनरत नेपाली विद्यार्थीहरूलाई कलेजले निष्काशन गरेको छ। घटनाको विरोध गर्ने र छानबिन माग गर्ने नेपाली विद्यार्थीहरूलाई सुरक्षाकर्मीले दमन पनि गरेका छन्।