एमाले निकट कर्मचारीको निर्वाचन तालिका सार्वजनिक

काठमाडौँ – नेकपा एमाले निकट नेपाल निजामती कर्मचारी संगठनको नयाँ कार्यसमिति निर्वाचनबाट चुन्ने प्रक्रिया अघि बढाइएको छ । सहमतिबाट कार्यसमिति चुन्ने कि निर्वाचनबाट भन्नेमा बहस भइरहेका बेला निर्वाचन आयोगले निर्वाचन कार्यक्रम सार्वजनिक गरेको हो ।

आयोग अध्यक्ष बाबुराम थापाले सार्वजनिक गरेको निर्वाचन तालिका अनुसार आज राति ११ बजेपछि मतदान सुरु गर्ने योजना छ । संगठनको अध्यक्षमा रेवन्त गौतम र भवानी दाहालले दाबी गरेका छन् । गौतम समर्थक निर्वाचनबाट कार्यसमिति चयन गर्नुपर्ने पक्षमा र दाहाल समर्थक सहमतिमा कार्यसमिति घोषणा गर्नुपर्ने पक्षमा छन् । यसमा सहमति नजुट्दा संगठनको महाधिवेशन एक दिन लम्बिसकेको छ ।

निजामती कर्मचारी संगठनको १२ औँ महाधिवेशन फागुन ३० गतेदेखि १ गतेसम्म गर्ने तालिका थियो । प्रधानमन्त्री तथा एमाले अध्यक्ष केपी शर्मा ओलीले राष्ट्रिय सभागृहमा महाधिवेशन उद्घाटन गर्दै सहमतिमा नेतृत्व चयन गर्न भनेका थिए । तर अधिकांश प्रतिनिधिहरू निर्वाचनमा जानुपर्ने पक्षमा उभिएपछि सहमति जुट्न सकेन । त्यसैले महाधिवेशन लम्बिएकाले आजबाट बबरमहलको कार्की ब्यांक्वेटमा निर्वाचन कार्यक्रम सुरु गरिएको छ ।

निर्वाचन तालिका अनुसार उम्मेदवारहरूले दरखास्त दिने समय आज दिउँसो ३ बजेदेखि ५ बजेसम्म तोकिएको छ । पहिलो नामावली प्रकाशन साँझ ६ बजेदेखि ७ बजेसम्म हुने छ । उम्मेदवारी फिर्ता लिने समय साँझ साढे ७ बजेदेखि १० बजेसम्म छ । ११ बजे उम्मेदवारको अन्तिम नामावली प्रकाशन हुने छ । लगत्तै मतदान सुरु गर्ने योजना छ ।