कमलपोखरीमा ग्याँस सिलिण्डर विष्फोट हुँदा १४ जना घाइते

काठमाडौं – काठमाडौंको कमलपोखरीमा ग्याँस सिलिण्डर विष्फोट भएको छ । काठमाडौं उपत्यका प्रहरी कार्यालयका प्रवक्ता प्रहरी वरिष्ठ उपरीक्षक शेखर खनालका अनुसार कमलपोखरीस्थित सानदार मस्म पसलमा ग्याँस सिलिण्डर पड्किएको हो ।

आज बिहान एक खाजा पसलमा भएको विष्फोटमा परी १४ जना घाइते भएका छन् । तीमध्ये ११ जनालाई अस्पताल लगिएको छ भने तीन जना सामान्य छन् । घाइते हुनेहरु पनि सोही पसलका कामदार रहेको प्रवक्ता खनालले बताए ।

घाइतेमध्ये एक जनाको अवस्था गम्भीर छ । उदयपुरका २४ वर्षीय संजोग मगर गम्भीर घाइते भएको प्रहरीले जनाएको छ । घाइतेहरुमध्ये पाँच जनालाई कीर्तिपुरको बर्न अस्पतालमा लगिएको छ । सिलिण्डर विष्फोटपछि घरको सिलिङ भत्किएर खसेको छ ।