४ राउन्ड हवाई फायर गर्दा नटेरेपछि गोली हानेर नियन्त्रणमा लियो ब्राउसुगर कारोबारी

काठमाडौं – झापाको कनकाई नगरपालिका-४ भित्री सडकखण्ड कुमरखोदबाट ब्राउनसुगरसहित प्रहरीले २ जनालाई नियन्त्रणमा लिएको छ ।

मंगलबार साँझ साढे ६ बजे कुमरखोदबाट सुरुङ्गातर्फ दुई जना लागुऔषध कारोबारी आउँदै गरेको सूचनाका आधारमा चेकजँच गर्दा बिहारका २८ वर्षीय अन्जार आलम र उनका भाइ १९ वर्षीय युसुब आलमलाई नियन्त्रणमा लिएको हो ।

उक्त सूचना पछ्याउन लागुऔषध नियन्त्रण ब्युरो काँकडभिट्टा र इलाका प्रहरी कार्यालय सुरुङ्गाको टोली विशेष चेकजाँचका लागि उक्त सडकखण्डमा परिचालन भयो। उक्त टोलीले बिआर३७एए ८४९८ नम्बरको भारतीय नम्बर प्लेटको मोटरसाइकललाई  रोक्न खोजेको थियो ।

तर उनीहरुले मोटरसाइकलको गति बढाएर चेकजाँचमा खटिएका प्रहरीलाई लडाउँदै भागे। यसपछि उनलाई रोक्न प्रहरीले पेस्तोलबाट ४ राउन्ड हवाई फायर गर्‍यो। ‘हवाई फायर गर्दासमेत नरोकिकन भागेपछि गोली हानेर नियन्त्रणमा लिएको झापाका प्रहरी उपरीक्षक मिलन केसीले बताए ।

केसीका असार अन्जारको देब्रे घुँडामुनि एक राउन्ड गोली प्रहार गरेपछि मोटरसाइकलसहित उनी ढले। त्यसपछि दुबै दाजुभाइलाई पक्राउ गरियो। अन्जारको प्रादेशिक अस्पताल भद्रपुरमा उपचार भइरहेको छ। युसुबलाई प्रहरीले हिरासत लिएको छ।

प्रहरी उपरीक्षक केसीका अनुसार अन्जारको साथबाट प्रतिबनन्धित लागुऔषध ब्राउनसुगर ३० ग्राम ६९० मिलिग्राम फेला परेको छ।bउनीहरुले लामो समयदेखि भारतबाट नेपालमा ब्राउनसुगर ल्याएर बेच्ने गरेको अनुमान प्रहरीको छ। ‘अहिले विस्तृत विवरणबारे अनुसन्धान भइरहेको छ,’ केसीले भने।