सिंहदरबारमा मधेश केन्द्रित ८ दलको बैठक बस्दै

काठमाडौं – मधेश केन्द्रित ८ दलहरुको संयुक्त बैठक आज बस्दै छ । थारु(मधेश केन्द्रित आठ दलीय मोर्चा बनाउने प्रयासमा रहेका नेताहरुको संयुक्त बैठक आज दिउँसो १ बजे नागरिक उन्मुक्ति पार्टी (नाउपा) को संसदीय दलको कार्यालय सिंहदरबारमा बस्न लागेको हो।

मधेश तथा थारु आन्दोलनबाट प्राप्त उपलब्धि र यसको रक्षाका लागि अपनाउने रणनीतिबारे छलफल गर्न आठ दलको बैठक बस्न लागेको सो पार्टीका नेताहरुले बताएका छन् ।

‘समान विचारवाहक आठ दलीय मोर्चाको काम कर्तव्य र अधिकारका साथै भावी योजनासम्बन्धी छलफलका लागि आठ दलबाट कार्यदलका सदस्य र वार्ता टोली संयोजकहरुलाई बैठकमा बोलाइएको छ,’ राष्ट्रिय मुक्ति पार्टी (रामुपा) नेपालका नेता केशव झाले भने ।

नाउपाका संरक्षक रेशम चौधरीले मधेश केन्द्रित दलहरुको मोर्चाबारे एकअर्काको धारणा बुझ्न बैठक राखिएको बताए ।