कर्णाली प्रदेश सभामा रिक्त संसदीय समितिले पायो पूर्णता

सुर्खेत – दश महिनादेखि नेतृत्वविहीन अवस्था रहेका कर्णाली प्रदेशसभाका तीन संसदीय समितिले पूर्णता पाएका छन् । गत वैशाखदेखि नेतृत्वविहीन रहेका सार्वजनिक लेखा, सामाजिक विकास, अर्थ तथा प्राकृतिक स्रोत समितिले आजबाट नेतृत्व पाएका छन् ।

लेखा समितिको सभापतिमा नेपाल कम्युनिस्ट पार्टी माओवादी केन्द्रका विन्दमान विष्ट, अर्थ तथा प्राकृतिक स्रोत समितिको सभापतिमा नेपाल कम्युनिस्ट पार्टी एमाले की दक्षिणा शाही र सामाजिक विकास समितिको सभापतिमा नेपाली काँग्रेसका पूर्णबहादुर खत्री निर्वाचित भएका छन् ।

कार्यवाहक सभामुख यशोदाकुमारी न्यौपानेले नवनिर्वाचित समितिका सभापतिहरूलाई बिहीबार पद तथा गोपनीयताको शपथग्रहण गराएका छन् । प्रदेश मामिला समितिको सभापतिमा भने नेपाल कम्युनिस्ट पार्टी ९एकीकृत समाजवादी०का प्रदेशसभा सदस्य कल्याणी खड्का निरन्तरता पाएकी छिन् ।

यसअघि लेखा समितिको सभापतिमा एमालेका जीतबहादुर मल्ल, अर्थ तथा प्राकृतिक स्रोत समितिका सभापतिमा दुर्गबहादुर रावत र सामाजिक विकास समितिका सभापति रहेका घनश्याम भण्डारी रहेका थिए ।

लामो समयसम्म समिति नेतृत्वविहीन हुँदा सरकारका कामकारबाही निगरानी गर्नेदेखि समितिमा गएका विधेयकउपर छलफल हुन सकेको थिएन । अब भने उक्त समस्या टरेको छ ।