एसएसपीको सरुवा निकाल्ने तयारी, काठमाडौं परिसरमा जान चर्को दौडधूप

काठमाडौं । नेपाल प्रहरीका एसएसपीहरुको सरुवा र पदस्थापन हुँदैछ । संभवतः आइतबार बेलुका वा सोमबारसम्म एसएसपी पदस्थापन र सरुवा निकाल्ने संभावना छ ।
जिल्ला प्रहरी परिसर काठमाडौं र उपत्यका अपराध अनुसन्धान कार्यालयको नेतृत्व पनि परिवर्तन गर्न लागिएको छ । काठमाडौं परिसरका एसएसपी बसन्त रजौरे र अपराध अनुसन्धानका प्रमुख सानुराम भट्टराईको कार्यकाल करिब ९ महिना पुगेको छ ।

काठमाडौं परिसर र अपराध अनुसन्धान कार्यालयमा सरुवा हुनका लागि एसएसपीहरुको चर्को दौडधूप चलेको छ । एसएसपीका लागि काठमाडौं परिसर र अपराध अनुसन्धान कार्यालय आकर्षक मानिन्छन् ।

काठमाडौं परिसर सरुवा हुनका लागि ३ एसएसपी लागेका छन् । विभिन्न जिल्लामा कमाण्ड सम्हाल्दा मदिरा पिएर ५ दिनसम्म सम्पर्कबिहीन बनेको आरोप लागेका एसएसपीहरुले पनि क्षेत्रीयता र गृहसचिवको निकटता देखाउँदै परिसरमा सरुवा हुनका लागि जोडबल लगाउँदैआएका छन् ।

काठमाडौं परिसरको एसएसपीका लागि गौतम बुद्ध अन्तर्राष्ट्रिय विमानस्थलमा कार्यरत एसएसपी रमेश बस्नेत, आईजीपी सचिवालयका विश्व अधिकारी, अपराध अनुसन्धान बिद्यालयका ओम अधिकारीको नाम चर्चामा छ । यी तीनमध्येबाटै एक एसएसपी काठमाडौंको एसएसपी हुने र अर्कोले अपराध अनुसन्धान कार्यालयको कमाण्ड सम्हाल्ने मौका पाउनेछन् । काठमाडौं परिसरमा ओम अधिकारी र विश्व अधिकारीको प्रतिस्पर्धा हुँदा बीचबाट रमेश बस्नेतले मौका पाउने संभावना पनि प्रबल रहेको बताइन्छ ।

एसएसपी विश्व अधिकारीलाई पूर्वगृहमन्त्री रवि लामिछानेले डीआईजी दानबहादुर कार्कीको सिफारिसमा आईजीपी सचिवालयमा सरुवा गरेका थिए । कार्की र अधिकारी तत्कालीन गृहमन्त्री लामिछानेका बिश्वासपात्रका रुपमा चिनिन्थे । आईजीपीले एसएसपी भूपेन्द्र खत्रीलाई सचिवालयमा ल्याउन खोजेका थिए । तर लामिछानेले हस्तक्षेप गरी अधिकारीलाई लगिएको थियो ।

विश्व अधिकारी कैलालीको एसपी हुँदा रामबहादुर थापा ‘बादल’ गृहमन्त्री थिए । कैलालीको एसपीबाट उनी २०७८ चैत २९ गते राति तानिएका थिए ।  उनको भूमिका सन्तोषजनक नभएपछि कैलालीबाट हालकी परराष्ट्रमन्त्री आरजु देउवाले नै उनलाई तान्न लगाएको चर्चा भएको थियो । अधिकारीलाई सीआईबीमा काजसरुवा गरी सोमेन्द्रसिंह राठौरलाई खटाइएको थियो ।

मोरङको एसपी हुँदा पनि उनीमाथि बजेटको २० लाख भन्दा बढी रकम सामान खरिद नगरी खर्च गरिएकोमा आईजीपी शैलेश थापा क्षेत्रीले फिर्ता गराएका थिए । त्यसपछिमात्र उनको ठाउँमा सरुवा भएका एसपी जनार्दन जीसीले चार्ज बुझेका थिए । अहिले उनी गृहमन्त्री लेखकसँग भेगीय नाता लगाएर काठमाडौंको कमाण्डर हुने कोसिसमा छन् । त्यसो त अधिकारी सिन्धुपाल्चोकमा डीएसपी हुँदा प्रमुख जिल्ला अधिकारी रहेका गोकर्णमणि दवाडी हाल गृहमन्त्रालयका सचिव भएकाले उनले काठमाडौंमा सरुवा हुन थप मद्दत पुग्ने अपेक्षा गरेका छन् ।